Դավիթը գնացել էր վերապատրաստման. «Հանուն գիտության զարգացման»-ի անդամը՝ «Սորոս»-ի հետ կապի մասին

Տեղեկացրել էինք, որ այսօր «Հանուն գիտության զարգացման» նախաձեռնության անդամներից երկուսը՝ Դավիթ Պետրոսյանը և Յուրի Ավագյանը, հացադուլ են հայտարարել: Դավիթ Պետրոսյանը նշել էր, որ տարկետման վերացման դեմ իրենց պայքարը շարունակվելու է այն կետից, որտեղից դադարեցվել է:

ԵՊՀ ռեկտոր Արամ Սիմոնյանն էլ «Ազատության» ուղիղ եթերում նշել էր, որ, իր կարծիքով, տղաների շարժումն ուղղորդված է: «Նրանք երեկ չէ առաջին օրն են եկել Լեհաստանից` «Սորոս»-ի հայտնի համաժողովից: Բբնականաբար, երևի ինչ-որ առաջադրանքներ են ստացել ու առավոտյան եկել, մտել են լսարան ու հացադուլ են անում»:

Yerkir.am-ի հետ զրույցում «Հանուն գիտության զարգացման» նախաձեռնության անդամներից Լևոն Չուկակլյանը նշեց, որ ռեկտորի հայտարարությունն անհիմն է: «Նման կարծիք արտահայտելն ուղղակի իրենց դերն է իջեցնում, և պարզ է դառնում, որ փորձում են խեղաթյուրել մեր պայքարի բովանդակությունը։ Ինչպես մեր տղաներից մեկն ասաց՝ մեզ ավելի շատ հովանավորում են հզոր ռենջերներն ու Ձմեռ պապը, քան «Սորոս»-ը։ Իսկ Դավիթի այցը Լեհաստան որևէ կապ չունի «Սորոս»-ի հետ, և մեր նախաձեռնության անդամներից որևէ մեկը չի գնացել Լեհաստան։ Դավիթը գնացել էր Լեհաստան` «Թրանսփարենսի ինթերնեյշնլի» անդամ լինելով՝ վերապատրաստման»,- ասաց նա։

Չուկակլյանի խոսքով՝  անհիմն կարծիքների համար պետք է ներողություն խնդրեն, քանի որ հասարակության առջև ոչ հիմնավորված խոսքերը չեն կարող փաստարկել։

Ըստ նրա՝ ինքն էլ վերջերս «Գագիկ Ծառուկյան» հիմնադրամից կրթաթոշակ է ստացել: «Հիմա ի՞նչ՝ պետք է ասեն՝ Ծառուկյա՞նն է մեզ հովանավորում։ Մարդու անձնական գործունեությունը և նրա ընկերների, ծանոթների շրջանակը որևէ ազդեցություն չունեն նախաձեռնության որոշումների հետ»,- ասաց նախաձեռնության անդամը:

Մանրամասները՝ տեսանյութում: