«Հայաստանի թվային օրակարգ» պլատֆորմն անհրաժեշտ ու հետաքրքիր նյութ է ապահովելու. վարչապետ

Այսօր կառավարության նիստում վարչապետ Կարեն Կարապետյանը հանձնարարական տվեց «Հայաստանի թվային օրակարգի» մշակման վերաբերյալ: Նրա խոսքով` արդեն մեկնարկել են «Հայաստանի թվային օրակարգ» ռազմավարական փաստաթղթի մշակման աշխատանքները։

Թվային օրակարգի մշակումը ուղղված է Հայաստանում կառավարման արդյունավետության բարձրացմանը, թափանցիկության և բարենպաստ բիզնես-միջավայրի ապահովմանը, հանրապետական կառավարման բոլոր ոլորտներում միասնական թվայնացված միջավայրի ձևավորմանը:

Այդ գործում կառավարությունը ներգրավել է փորձառու միջազգային և տեղական մասնագետների։ Սակայն ժամանակակից թվային օրակարգի իրագործումը պահանջում է միասնական, մասնագիտացված և համակարգված մոտեցումներ: Ելնելով վերոնշյալից` նա հանձնարարեց հանրապետական գործադիր մարմինների ղեկավարներին՝ մինչև ս.թ. նոյեմբերի 30-ը` փաստաթղթի մշակման աշխատանքների իրականացման ընթացքում, սերտ համագործակցել Ռազմավարական նախաձեռնությունների կենտրոնի և «Թվային Հայաստան» հիմնադրամի հետ՝ տրամադրելով բոլոր անհրաժեշտ տվյալները և օժանդակությունը։

«Հատուկ խնդրում եմ ուշադրության ներքո պահել` այդ պլատֆորմը ստեղծելու ժամանակ ունենալու ենք որոշում կայացնելու համար անհրաժեշտ հետաքրքիր նյութ»,- ասաց Կարեն Կարապետյանը: