Կօպտիմալացվեն Երևանի 3 հոգեբուժարանները

ՀՀ առողջապահության նախարար Լևոն Ալթունյանն այցելել է ՀՀ ԱՆ  «Ավան» հոգեկան առողջության կենտրոն, «Նորք» և «Նուբարաշեն» հոգեբուժական կենտրոններ։ Նախարարը շրջել է բուժհաստատություններում, ծանոթացել թողունակությանը, հիվանդների բուժման ընթացքին, առկա հնարավորություններին և խնդիրներին։

  «Ավան» հոգեկան առողջության կենտրոնում վերջին շրջանում նորոգվել են ընդունարանը, դեղատունը, հնարավորություններ են ստեղծվել ավազային թերապիայի, խմբակային և անհատական խորհրդատվության, արտթերապիայի համար։

Նախարարը հանձնարարել է մշակել և ներկայացնել կենտրոնի զարգացմանն ուղղված իրենց տեսլականը։

 «Նորք» հոգեբուժական կենտրոնում ևս Լևոն Ալթունյանին ներկայացվել են սեփական միջոցներով իրականացված նորոգումները, մանկական ամբուլատոր ծառայության կազմակերպման պայմանները, ինչպես նաև ԵՊԲՀ-ի հոգեբուժության ամբիոնի հնարավորությունները։

Նշենք, որ նախարարության կառուցվածքային բարեփոխումների հանձնաժողովը վերջին 2-3 ամիսներին ուսումնասիրություններ է կատարում հոգեբուժության ոլորտի բարփոխման քայլերի հստակեցման նպատակով։ Այցի արդյունքները կքննարկվեն Երևանի երեք հոգեբուժարանի օպտիմալացման ենթատեքստում։