Մալաթիայի նախկին թաղապետի որդու սպանության երկու «պատվիրատուները» հանդիպեցին

Մալաթիայի նախկին թաղապետի՝ Վահան Զատիկյանի որդու՝ Սեդրակ Զատիկյանի սպանությունից 10 տարի անց «Դատապարտյալների հիվանդանոց» ՔԿՀ-ում կայացած արտագնա դատական նիստում հանդիպեցին սպանության երկու «պատվիրատուները»՝ Ստեփան Հակոբյանի և Նարեկ Խաչատրյանը:

Հիշեցնենք, որ «Դատապարտյալների հիվանդանոց» ՔԿՀ-ում իր պատիժն է կրում Լեդի Հակոբի եղբորորդին՝ Ստեփան Հակոբյանը, ով 2013-ի դեկտեմբերի 9-ին Մալաթիայի դատարանի կողմից մեղավոր էր ճանաչվել Զատիկյանի սպանությունը պատվիրելու համար և դատապարտվել 15 տարվա ազատազրկման: Նա, ըստ ՔԿՀ-ի, առողջական խնդիրներ ունի: Նշենք, որ ամիսներ շարունակ դատարանին չէր հաջողվում Ստեփան Հակոբյանին բերել դատարան և հարցաքննել: Հակոբյանը Զատիկյանի սպանության երկրորդ «պատվիրատուի»՝ Նարեկ Խաչատրյանի վերաբերյալ քննվող քրեական գործով առանցքային նշանակություն ունեցող վկա է: Ստեփան Հակոբյանը դատարան ուղարկված գրություններով բազմիցս հայտարարել է, որ, օգտվելով իր իրավունքից, չի ցանկանում ցուցմունք տալ և ներկայանալ նիստերին:

Նարեկ Խաչատրյանի պաշտպան Վարդուհի Էլբակյանը Yerkir.am-ին հայտնեց, որ այսօրվա արտագնա դատական նիստի ընթացքում Հակոբյանը հրաժարվել է ցուցմունք տալ, ինչից հետո դատարանը հրապարակել է նրա նախաքննական ցուցմունքը: «Նախաքննական ցուցմունքի վերաբերյալ Հակոբյանը դիրքորոշում չհայտնեց: Ես ընդամենը հարցրեցի` սա Ձեր նախաքննական ցուցմունքն է, Դուք պնդո՞ւմ եք այն, նա ասաց` կարող եմ հարցերին չպատասխանել»,- ասաց պաշտպանը:

Մեղադրական եզրակացության համաձայն՝ Նարեկ Խաչատրյանը, Ստեփան Հակոբյանի հետ նախնական համաձայնությամբ, նախկինում ունեցած վեճի պատճառով վրեժխնդիր լինելու նպատակով, Արսեն Առուշանյանին նյութապես շահագրգռելով, դրդել, պատվիրել են սպանել Սեդրակ Զատիկյանին:

Հիշեցնենք, որ Սեդրակ Զատիկյանը սպանվել է 2006թ. հունիսի 22-ին Սեբաստիա և Տիչինա փողոցների խաչմերուկում «ԱԿՍ» տեսակի ինքնաձիգից: Զատիկյանի սպանությունը կատարելու և օժանդակելու համար դեռևս 2007-ին Մալաթիա-Սեբաստիա վարչական շրջանների ընդհանուր իրավասության դատարանի վճռով Ա. Առուշանյանը, Ա.Հովհաննիսյանը և Լ. Ղևոնդյանը դատապարտվել էին ազատազրկման, իսկ սպանության պատվիրատուների նկատմամբ հայտարարվել էր հետախուզում:

Զատիկյանի սպանությունը պատվիրելու մեջ մեղադրվող` ԱԺ նախկին պատգամավոր Հակոբ Հակոբյանի (Լեդի Հակոբի) եղբորորդին՝ Ստեփան Հակոբյանը, հայտնաբերվեց 2011 թվականի դեկտեմբերին: 2013-ի դեկտեմբերի 9-ին Մալաթիայի դատարանը Հակոբյանին մեղավոր ճանաչեց և դատապարտեց 15 տարվա ազատազրկման:

Հաջորդ դատական նիստը կկայանա մարտի 21-ին: