Դիարբեքիրում պարետային ժամ է հայտարարվել

Թուրքիայի Դիարբեքիր նահանգի Լիջե և Հազրո շրջանների 12 թաղամասերում հայտարարվել է պարետային ժամ: Ըստ թուրքական «Haber7»-ի` պարետային ժամը ուժի մեջ է մտել փետրվարի 2-ից:

Ըստ Ermenihaber-ի՝ որպես պարետային ժամի հայտարարման պատճառ, Դիարբեքիրի նահանգապետարանը նշել է այն, որ թուրք ուժայինները պատրաստվում են օպերացիա իրականացնել քուրդ զինյալների հենակետերի ուղղությամբ: Օպերացիայի ընթացքում նախատեսվում է ոչնչացնել քուրդ զինյալներին պատկանող մի շարք թաքստոցներ և զինպահեստներ:

Պարետային ժամի մասին հայտարարությունը Դիարբեքիրի նահանգապետարանը հրապարակել է գրավոր: Նշվում է, որ  այդ ամենն արվել է՝ ելնելով Թուրքիայի քաղաքացիների անվտանգության նկատառումներից: Պարետային ժամը կգործի այնքան ժամանակ, մինչև կհրապարակվի հավելյալ ծանուցում տեղական ինքնակառավարման մարմինների կողմից: