Աղվան Հովսեփյանը խիստ դժգոհ է, նախարարները նրան հակադարձում են

Այսօր կառավարության նիստում վարչապետ Կարեն Կարապետյանը նախքան օրակարգին անցնելը հարցրեց, թե կա՞ն, արդյոք, առարկություններ զեկուցվող հարցերի վերաբերյալ: Առարկություն ուներ ՀՀ քննչական կոմիտեի նախագահ Աղվան Հովսեփյանը:

Նա նախ առաջարկեց օրակարգից հանել առաջին հարցը, որը վերաբերում էր «Դատախազության մասին» օրենքում փոփոխություններ անելու մասին օրինագծին, ըստ որի` գլխավոր դատախազությունը յուրաքանչյուր տարի` մինչև ապրիլի 1-ը, պետք է հրապարակի հանցագործությունների քննության վերաբերյալ հաղորդում Հայաստանի Հանրապետության գլխավոր դատախազության կայքէջում: Դատախազության հաղորդումը պետք է պարունակի տեղեկություններ նախորդ տարվա ընթացքում կատարված հանցագործությունների քննության արդյունքների վերաբերյալ, վիճակագրական տվյալներ, համեմատական վերլուծություններ և եզրահանգումներ: Աղվան Հովսեփյանը դժգոհեց, որ նախագիծը ներկայացնող մարմինն իրենց տեղյակ չի պահել մշակվող օրենքի մասին, չի ուղարկել նախագիծը: Նա ասաց, որ ՀՀ-ում կա չորս քննչական մարմին, որոնցից ոչ մեկին նախագիծը չի ուղարկվել:

Կառավարության աշխատակազմի ղեկավար-նախարար Դավիթ Հարությունանը հակադարձեց` ասելով, որ կոմիտեում ընդունված որոշումները ուղարկվել են բոլոր գերատեսչությունների էլեկտրոնային փոստին:

Հովսեփյանը նշեց. «Կոմիտեի նիստի նյութերն էլ չենք ստացել: Այս նախագիծը բովանդակային առումով հակասում է ՀՀ Սահմանադրությանը: Այն կարող է կարգավորվել ոչ թե օրենքով, այլ կառավարության որոշմամբ»:

Դավիթ Հարությունյանը պնդեց, որ նախագիծն ուղարկվել է:

Կարեն Կարապետյանը չհանեց այդ հարցը օրակարգից` առաջարկելով երեք օր ժամանակ վերցնել հարցը լրացուցիչ քննարկելու համար: Աղվան Հովսեփյանը նորից հակադարձեց, ասելով, որ կառավարությունը հարցը վաղուց կարգավորել է, որից ելնելով էլ նախաքննական մարմինները ամենամսյա կտրվածքով տեղեկություն են տրամդրում դատախազությանը՝ գործերի քննության վերաբերյալ:

«Հարցը օրենքով կարգավորելու անհրաժեշտություն չկա, որովհետև, կառավարության որոշմամբ, հարցն արդեն կարգավորված է: Դատախազությունն իրավունք չունի նորմատիվ ակտ ընդունելու, որը պարտադիր կլինի նախաքննության մարմնի համար»,- դժգոհեց Աղվան Հովսեփյանը:

Արդարադատության նախարար Արփինե Հովհաննիսյանը ներկայացրեց այն հարցը, որը Աղվան Հովսեփյանն առաջարկել էր օրակարգից հանել: Նա նշեց, որ այս հարցը տևական ժամանակ է` քննարկվում էր, և առաջարկվում է կոռուպցիոն բնույթ կրող հարցերի հաշվետվությունը ներկայացնել առանձին:

Աղվան Հովսեփյանի հերթական առարկությանը վարչապետն արձագանքեց, որ բանավեճը ծավալվում է մասնագիտական հարցերի շուրջ, և արդեն իսկ առաջարկվեց երեք օր ժամանակ` առարկությունները քննարկելու համար: