Քաղցկեղով հիվանդացության դեպքերի 50 տոկոսը հայտնաբերվում է հիվանդության` 3-4-րդ փուլում

Հայաստանում քաղցկեղով հիվանդացության և մահացության դեպքերն ավելացել են: Տղաների շրջանում ակնհայտ է թոքի քաղցկեղի տարածվածությունը, երկրորդ տեղում` շագանակագեղձի քաղցկեղն է, իսկ կանանց շրջանում` կրծքագեղձի քաղցկեղն է ամենատարածվածը: Խնդիրն այն է, որ դեպքերի 50 տոկոսը հայտնաբերվում է 3-4-րդ փուլում, իսկ դա այն փուլն է, երբ բուժման արդյունավետությունը 9-11 տոկոս է կազմում: Ուշագրավ է այն հանգամանքը, որ կանայք ավելի զգոն են և ավելի հաճախ են դիմում մամոգրաֆիկ հետազոտման:

Այսօր` լրագրողների հետ հանդիպման ժամանակ, ՀՀ ԱՆ ԾԻԳ-ի հիվանդանոցային համակարգի արդյունավետության և որակի բարելավման բաղադրիչի համակարգող Դավիթ Մելիք-Նուբարյանը նշեց, որ իրենց աշխատանքը երկու ուղղությամբ է ընթանում` կանխարգելում և ենթակառուցվածքների ստեղծում.«Ծխելը, քրոնիկական չբուժված հիվանդությունը և գիրությունը` Հայաստանում քաղցկեղով հիվանդացության հիմնական պատճառներն են: Ծխելն արգելելու համար ամենաարդյունավետ միջոցը ծխախոտի գինը թանկացնելն է, իսկ գիրության դեմ կարելի է պայքարել` ուղղակի ավելի շատ շարժվելով: Քաղցկեղի համար նկան մի շարք դեղամիջոցներ: Երբեմն մարդիկ նախընտրում են գնալ արտերկիր` տեղում ստանալով ինչ-որ դեղամիջոց, որը «տարածված» է: Ուզում եմ ասել, որ լավն ու թանկը ընդհանրապես նույնը չեն` Հայաստանում կան լավ դեղամիջոցներ»:

Յոլյանի անվան Արյունաբանական կենտրոնի մեծահասակների արյունաբանական կլինիկական բաժանմունքի ղեկավար և ոսկրածուծի փոխպատվաստման թիմի ղեկավար Կարեն Մելիքսեթյանը նշեց, որ իրենց կենտրոնը նոր տեխնիկա է ձեռք բերել, ինչպես նաև 2 նոր բաժանմունք է բացվել` ցողունային բջիջների լաբորատորիան և ոսկրածուծի փոխպատվաստման բաժանմունքը: «Փետրվարի կեսերին 4 հիվանդի արդեն փոխպատվաստում կանենք: Ոսկրածուծի փոխպատվաստման կարիք ունեցող հիվանդներ միշտ եղել են, և մենք բացել են այս կենտրոնը, որպեսզի մարդիկ չգնան այլ երկիր` բուժում ստանալու համար: Արյուբանական ծառայության սպասարկման տարիքային սահմանափակում չկա, միայն 60-ն անց հիվանդների փոխպատվաստման դեպքում կա սահմանափակում, քանի որ այդ տարիքում մարդիկ ունենում են փոխկապակցված հիվանդություններ, ինչը փոխպատվաստման դեպքում մի շարք բարդությւոնների է հանգեցնում»,-ասաց Մելիքսեթյանը: