Սննդամթերքի անվտանգությունն ամենօրյա հսկողություն է պահանջում

Որակը ինչպես տեխնիկապես և իրավաբանորեն սահմանված, այնպես էլ բարոյական ձևակերպում է. այսօր լրագրողներին ասաց Սպառողների միության նախագահ Արմեն Պողոսյանը` միաժամանակ շնորհավորելով Որակի համաշխարհային օրը:

Նրա խոսքով՝ համեմատած անցած 10-15 տարիների հետ, Հայաստանում ներկայումս սննդամթերքի արտադրության բնագավառում շատ մեծ առաջընթաց կա`  որակական, անվտանգության, ընտրության, սպասարկման առումներով:

«Բայց խնդիրները շատ են»,- հավելեց Պողոսյանը` օրինակ բերելով սննդի պետական ծառայությանն անձամբ իր ներկայացրած 15 նմուշ զովացուցիչ ջրերը, որոնցից 11-ը փաստաթղթային արձանագրությամբ ճանաչվել են օրգանիզմի և օգտագործման համար  ոչ պիտանի::

«Անցել է 3-ից ավելի ամիս, և ես չունեմ պատասխան, թե ի՞նչ եղավ այդ արտադրողների ճակատագիրը: Մինչև ե՞րբ պետք է մեր երեխաները խմեն այդ ոչ պիտանի զովացուցիչ ջուրը»,- նշեց նա:

Սննդամթերքի անվտանգության և որակի հսկողության տեսչության պետ Վահե Դանիելյանը հայտնեց, որ հուլիսի 14-ին կազմակերպել էին քննարկում, որին մասնակցում էին արտադրողները: Նրանց  ներկայացվել են այն խախտումները, որոնք կան նրանց արտադրանքում, և տրվել են հստակ հանձնարարականներ` սեղմ ժամկետներում վերացնել դրանք: «Օգոստոսից մինչ այսօր արտադրողների հետ անցկացրել ենք հսկայական աշխատանք, և նրանք վերացրին իրենց արտադրանքում առկա բոլոր թերությունները»,- Պողոսյանի բարձրացրած խնդրին անդրադառնալով` ասաց նա:

Դանիելյանը հավելեց, որ տվյալ ոլորտում կան խնդիրներ, բայց չկա մի երկիր, որտեղ սննդամթերքի անվտանգության բնագավառում խնդիրներ չլինեն, սա այն բնագավառն է որտեղ ամենօրյա հսկողություն է պահանջվում: