Սա Երևանն է` չքանդե՛լ

Օրերս ՀՀ քաղաքաշինության նախարար Նարեկ Սարգսյանը հանդիպել էր մի խումբ արվեստագետների հետ, ովքեր մտահոգված են Երևանում հին շենքերի ճակատագրով: Սարգսյանը խոստացել է, որ Հրշեջների շենքը, «Դոլմամա»-ն չեն քանդվելու, և իրենք կատարելու են իրենց խոստումը:

Ուշագրավ է այն հանգամանքը, որ նախարարն արվեստագետներից պահանջել է ներկայացնել ցանկ, թե նրանք որ շենքերը չենք ուզում, որ քանդվեն, և խոստացել, որ իրենք ականջալուր կլինեն:

Առաջարկն ուղղակի զավեշտ է: Պատկերացնո՞ւմ եք` արվեստագետները ներկայացնում են ցանկ, թե որ շենքերը չպետք է քանդվեն, իսկ հետո պատկան մարմինները նիստ են գումարում, գերակա շահի անվան տակ սկսում քանդել այն շենքերը, որոնք չկան այդ ցանկում: Դեռ մի բան էլ նրանք կարող են արդարանալ, թե`այդ շենքերը չկային ձեր ներկայացրած ցանկում, չբողոքե՛ք:

Քանդման ոչ ենթակա շենքերի ցանկում ինչ-որ կառույցներ ընդգրկելու գործընթացը պետք է շարունակական բնույթ կրի. միգուցե ժամանա՞կն է մասնագիտական հանձնախումբ ստեղծել, իսկ հանրային տարածքները հանրային քննարկման դնել, նոր որոշել դրանց ճակատագիրը:

Ասում են` ժամանակին Ճարտարապետների միության շենքում կախվում էին բոլոր նախագծերը` քանդման ենթակա ու դրանց տեղը կառուցվող շենքերի, ասում են` հենց այնտեղ էլ ժամանակին հանրային քննարկման էին դրվում հանրային տարածքների հետ կապված նախնական որոշումները, բայց այսօր միայն հայտարարվում է` հարցը դրվել է հանրային քննարկման, իսկ թե ո՞վ է մասնակցել դրան, ոչ ոք չգիտի:

Առաջարկում եմ` որպես քանդման ոչ ենթակա կառույցների ցանկ` քաղաքաշինության նախարարությանը ներկայացնել Երևանի հատակագիծը` ահա՛ և մեր ցանկը:

Կարինե Հարությունյան