Իշխանությունների հետ միշտ էլ կարելի է խոսել. Միքայել Մելքումյան

ԲՀԿ-ական Միքայել Մելքումյանը Yerkir.am-ի հետ զրույցում հավաստիացրեց, որ ԲՀԿ-ն չի լքելու:

Դիտարկմանը` Դուք մշտապես  ընդգծում եք, որ իշխանութունների հետ պետք է գնալ երկխոսության, մինչդեռ ԲՀԿ-ն որդեգրել է ընդդիմադիր կեցվածք, նա արձագանքեց. «Կուսակցությունում կա մի գիծ, տարբեր գծեր չկան, և եթե կուսակցության  կազմում ես, տարբեր ասելիքներ չկան:  Մշտապես կարող են լինել աշխատանքային քննարկումներ, բայց  կուսակցությունում  վերջնական արդյունքում մեկ գիծ է լինում: Իշխանությունների հետ միշտ էլ կարելի է խոսել: Ինչի, Ղարաբաղի հարցով Ադրբեջանի հետ մենք չե՞նք խոսում: Համագործակցությունն իշխանությունների հետ կարող է լինել, ասենք, օրենքների շուրջ»:

Հարցին, թե` Դո՞ւք էլ Նաիրա Զոհրաբյանի նման կողմ եք, որր ԲՀԿ-ում լինեն ինքնազտման ու ինքնամաքրման աշխատանքներ, Մելքումյանը պատասխանեց. «Այդ աշխատանքները ժամանակ առ ժամանակ, այսպես, թե այնպես, կատարվում են, հատուկ ինչ-որ մեկը չկա, որ դրոշակը պահած գնա ինքնամաքրման»:

Հիշեցնենք, որ ըստ մամուլի հրապարակումների, նոր արտահոսք է սպասվում ԲՀԿ-ից: Նշենք, որ Վահան Բաբյանը մեզ հետ զրույցում հաստատել է, որ դուրս է գալիս ԲՀԿ-ից: