Zaman-ի գրավումը եւս մի հարված է` Թուրքիայի ազատ մամուլին. Եվրախորհրդարանի նախագահ

Ինչպես  արդեն տեղեկացրել էինք, Ստամբուլի դատարանի որոշմամբ թուրքական ընդդիմադիր Zaman թերթի կառավարումը  հանձնվել է պետության կողմից նշանակված հոգաբարձուներին:

Այդ որոշումն առաջացրել է թուրք հանրության դժգոհությունը: Նախօրեին թերթի խմբագրության մոտ բողոքի ցույցի դուրս եկած մարդկանց եւ խմբագրակազմի անդամներին  ոստիկանները ցրել են ռետինե փամփուշտներով եւ արցունքաբեր գազով:

Եվրախորհրդարանի նախագահ Մարտին Շուլցը ստեղծված իրավիճակի առնչությամբ իր անհանգստությունն է հայտնել:  Նա նշել է, որ  թուրքական իշխանությունների գործողությունների հարցը   կընդգրկվի մարտի 7-ին նախանշված ԵՄ-Թուրքիա գագաթաժողովի օրակարգում, որ կկայանա Բրյուսելում:

«Zaman-ի գրավումը  եւս մի հարված է` Թուրքիայի ազատ մամուլին»,- հայտարարել է Շուլցը:

Ավելի վաղ ԵԽ գլխավոր քարտուղար Թյորբորն Յագլանդը նույնպես մտահոգություն էր հայտնել Zaman-ի շուրջ ստեղծված իրավիճակի առնչությամբ: