Ռուսաստանի խոցելի վիճակը պրոյեկտվում է Հայաստանի վրա. տնտեսագետ

Ռուսաստանի տնտեսությունը գահավիժում է. այսօր լրագրողների հետ զրույցում կարծիք հայտնեց տնտեսագետ Վարդան Բոստանջյանը:

«Հայաստանի ունեցած կապերի 70 տոկոսից ավելին ՌԴ-ի հետ է,  և պատկերացրեք, եթե Ռուսաստանում տիրում է խոցելի վիճակ, ըստ էության, այն նույնը  պրոյեկտվում է Հայաստանի վրա: Մեր իշխանությունները կարծես պահպանում են արժույթի հավասարակշռությունը: Մեր իշխանությունները միշտ օգտագործել են իրենց հնարավորությունները, բոլոր գործիքները՝ դրամական հարաբերություններում կայունություն ապահովելու կտրվածքով: Շատ երկրներում Կենտրոնական բանկի վրա է դրված գների կայունացման ապահովման խնդիրը, և նման խնդրի լուծումը, ըստ էության, պայմանավորված է նաև կառավարության կոորդինացված գործունեությամբ, հակառակ պարագայում` իշխանություններն իրենց  ունեցած գործիքաշարով  ի զորու չեն դիմակայել փոխանակային ճնշումներին»,- ասաց տնտեսագետը:

Նրա կարծիքով` այս պահի դրությամբ Հայաստանում գահավիժող վիճակ չի գրանցվում, բայց սա էլ մտահոգության տեղիք է տալիս, քանի որ արհեստականորեն այս վիճակը պահելը պետք է լինի փոքր, հետագայում դա իրեն զգացնել պետք է տա, առավել ևս` երբ  հայտնի է, որ բազմաթիվ երկրներում արժույթները գահավիժում են: