Եկող տարի առաջնային խնդիր ենք համարում մթերման հարցը լուծելը. նախարար

Այսօր 2015 թվականին կատարված աշխատանքներն ամփոփեց ՀՀ գյուղատնտեսության նախարար Սերգո Կարապետյանը: Նա խոստովանեց, որ հաջողությունների կողքին եղել են նաև  թերացումներ, որոնք ակնառու էին: Մասնավորապես, ըստ նախարարի,  թերացումները կապված էին վերամշակման ու մթերումների հետ:

 «Հայտնի է, որ բուսաբուծության ոլորտում հատկապես մեծ ծավալներ ունեցան խաղողի ու պտղի արտադրությունը, դրանց ծավալները ավելացել էին` անցյալ տարվա համեմատ: Խաղողի մթերման հարցում մենք ունեցանք դժվարություններ, եղան լարվածություններ, բողոքներ գյուղացիական տնտեսությունների կողմից, որովհետև այն ծավալները, որոնք առաջարկվում էին գյուղացիական տնտեսությունների կողմից, մթերող կազմակերպությունները սկզբնական շրջանում չէին կարողանում մթերել: Բայց կառավարության կողմից ձեռնարկված միջոցառումների շնորհիվ բոլոր մթերող կազմակերպությունները պատրաստ եղան, ճիշտ է, մեծ դժվարություններով մթերել խաղողը: Գների առումով որոշակի իջեցում եղավ, բայց կարևորն այն է, որ խաղողի բերքը չմնաց դաշտում»,- ասաց նախարարը:

Նա խոստովանեց, որ մթերման գներին այս տարի նվազեցին, և դա  կապված է մի շարք հանգամանքների հետ` միջազգային տենդենցներ, որովհետև միջազգային բորսաներում պարենային կարևորագույն ապրանքների` կաթի, մսի, ցորենի գները 25-30 տոկոսով իջան այս տարի, ընդ որում` նման խնդիր կար անգամ եվրոպական երկրներում: Մյուս գործոնը կապված էր միջազգային շուկայի հետ, որովհետև, ռուբլու արժեզրկման հետ կապված, մթերող կազմակերպությունները մի շարք դժվարություններ ունեցան, հատկապես` գինու, կոնյակի, պահածոների հետ:

 Նախարարի խոսքով` կարևոր է լուծել  պայմանագրային հարաբերությունների ձևավորումը արտադրողի և մթերողի միջև: Կան  մի քանի վերամշակող կազմակերպություններ,  որոնք այդպես են աշխատում գյուղացիների հետ, դրանից են` Արարատի գինու-կոնյակի գործարանը, որը խնդիրներ չունեցավ` գյուղացիների բերքի մթերման հետ կապված:

 «Եկող տարի առաջնային խնդիր ենք համարում մթերման հարցը լուծելը, որպեսզի մթերող կազմակերպությունները գյուղացիների հետ պայմանագրեր ունենան: Շատ գյուղացիական տնտեսություններ իրենք են հրաժարվում պայմանագրերից` ակնկալիքով, որ վաղը ավելի բարձր գնով կարող են վաճառել իրենց բերքը»,- ասաց նախարարը` հավելելով, որ այսօր խնդիրներ ունեն թե\' գյուղացիները, թե\' վերամշակող ընկերությունները:

 Լրագրողների հարցին, թե այս պահի դրությամբ ի՞նչ պարտքեր ունեն վերամշակող կազմակերպությունները, Սերգո Կարապետյանը պատասխանեց, որ պտուղ-բանջարեղեն վերամշակող գործարանները պարտքերը փակել են 98,5 տոկոսով, գինու գործարանները` 82,1 տոկոսով: