Ինչո՞ւ են ուժեղացված հսկողության տակ պահում Կայարանցի Թևոսիկի եղբոր սպանության գործով մեղադրյալին

Քրեական հեղինակություն Կայարանցի Թևոսիկի եղբոր՝ Արթուր Սաֆարյանի սպանության գործով մեղադրյալ Իսրայել Սարգսյանի նկատմամբ շարունակվում է ուժեղացված հսկողությունը: Եթե նախորդ դատական նիստում, բացի ուղեկցող գումարտակից, նրան ուղեկցում էին նաև ոստիկանության հատուկ նշանակության 3 ջոկատայիններ, ապա այս նիստում նրանց թիվը 6-ն էր: Նշենք, որ շուրջ 10 ամիս տևած դատաքննության ընթացքում մեղադրյալի նկատմամբ երբևէ նման հսկողություն չէր սահմանվել:

Ավելի վաղ հայտնել էինք, որ, Yerkir.am-ին հասած որոշ տեղեկություններով՝, իրավապահ մարմինները օպերատիվ տեղեկություններ են ստացել այն մասին, որ Իսրայել Սարգսյանի դեմ մահափորձ է ծրագրվում, և դա կանխելու նպատակով անվտանգության միջոցառումներ են ձեռնարկվել նրան դատարան տեղափոխելու և դատարանում պահելու ընթացքում: Այս կապակցությամբ Yerkir.am-ը գրավոր հարցում էր ուղարկել ոստիկանություն՝ ճշտելու.

1. Ի՞նչ նպատակ էր հետապնդում Իսրայել Սարգսյանի նկատմամբ հատուկ նշանակության ջոկատի աշխատակիցների կողմից հսկողություն սահմանելը:

2. Արդյո՞ք «Նուբարաշեն» ՔԿՀ-ն դիմել է ոստիկանությանը` Իսրայել Սարգսյանին դատարան բերելու ճանապարհին և դատարանում նրա անվտանգությունն ապահովելու հարցով:

3. Ճի՞շտ է, որ իրավապահները տեղեկություններ են ստացել Իսրայել Սարգսյանի կյանքին սպառնացող վտանգի վերաբերյալ:

Ի պատասխան մեր հարցմանը, ոստիկանությունից ասել են, որ ամբաստանյալ Իսրայել Սարգսյանին հատուկ նշանակության ջոկատայինների ուղեկցությունը դեպի Կենտրոն-Նորք-Մարաշ վարչական շրջանների ընդհանուր իրավասության դատարան կատարվել է օպերատիվ-ծառայողական նկատառումներով: