Այո, ես թուրք եմ, սակայն դա իմ մեղքը չէ. թուրք կինոդերասանուհի

Թուրքիայում ամենահայտնի կինոդերասանուհիներից Սերրա Յըլմազը ամերիկացի հեռուստահաղորդավար Էնթոնի Բուրդայնի հետ զրույցում արած ուշագրավ հայտարարությունների համար Twitter-ում թուրքերի կողմից բազում քննադատությունների է արժանացել:

 Ըստ Radikal-ի՝ հեռուստահաղորդավարի՝ «թուրք լինելն ինչպիսի՞ զգացում է» հարցին ի պատասխան, Յըլմազն ասել է. «Այո, ես թուրք եմ, սակայն դա իմ մեղքը չէ»:

Հայտնի կինոդերասանուհին իրեն քննադատողներին պատասխանել է Twitter-յան իր էջում՝ ասելով. «Ոչ ոք չի ընտրում իր ծննդավայրը, դա պարզապես հումոր էր: Ես ոչ մեկին նեղացնող հայտարարություն չեմ արել, էլ չեմ ասում, որ այս հումորը ես անում են տարիներ շարունակ»:

Թուրքիայում անցկացված նկարահանումների ընթացքում ամերիկացի հեռուստահաղորդավար Բուրդայնն այցելել է «Հինգշաբթի» անունը կրող շուկան և մտել հայի պատկանող ռեստորան:

Բուրդայնի՝ «ինչպե՞ս եք նայում հայերի՝ Թուրքիայում գոյությանը» ռեստորանի տերը պատասխանել է. «Եթե այսպես շարունակվի, այս երկրում հայ երիտասարդություն չի մնա: Բոլորը կլքեն այս երկիրը»: