Եվրոպան և Իսրայելը հրաժարվում են ադրբեջանական նավթից

Շուկաներից եկող տեղեկությունների համաձայն` Արևմտյան Աֆրիկայից նավթի մատակարարումների մեծացման կապակցությամբ Եվրոպայում կնվազեն վաճառքի ծավալները: Դա կհանգեցնի նաև այն բանին, որ կնվազեն Ադրբեջանի Azeri Light եւ CPC Blend նավթի վաճառքի ծավալները: Այդ մասին գրում է ամերիկյան անկախ Platts գործակալությունը՝ աշխարհում էներգետիկ արդյունաբերության վերաբերյալ ամենահեղինակավոր տեղեկատվական աղբյուրներից մեկը. հայտնում է haqqin.az-ը:

Նշվում է, որ Եվրոպան, հաշվի առնելով Ասիայում աֆրիկյան նավթի պահանջարկի նվազումը և փոխադրման հարմար ուղին, որոշել է  սեպտեմբերին չմշակված նավթի լրացուցիչ մատակարարումներ  ընդունել Նիգերիայից եւ Անգոլայից: Փորձագետների գնահատականներով՝ սեպտեմբերին Արևմտյան Աֆրիկայից Եվրոպա կարող է մատակարարվել մոտ 50 մլն բարել նավթ: Մասնավորապես՝ աֆրիկյան նավթը սկսել են քիչ գնել Հնդկաստանը և Չինաստանը:

Բացի այդ` մի քանի օր առաջ The Financial Times թերթը հայտնել էր մայիսի սկզբից մինչեւ օգոստոսի 11-ը Իսրայելի կողմից իրաքցի քրդերից 19 մլն բարել նավթ գնելու մասին, որի արժեքը համաշխարհային գներով կազմել է գրեթե 1 մլրդ դոլար: