Դեկորատիվ ջրավազաններում լողալը` աղիքային հիվանդությունների պատճառ

ՀՀ առողջապահության նախարարության հիվանդությունների վերահսկման և կանխարգելման կենտրոնի գլխավոր տնօրենի տեղակալ Նունե Բակունցն այսօր լրագրողների հետ հանդիպման ընթացքում անդրադարձավ եղանակային շոգ պայմաններում դեկորատիվ ջրավազաններում լողալու վտանգներին:

«Դեկորատիվ ջրավազաններն ընդհանրապես նախատեսված չեն լողալու համար: Օրինակ` շատրվանները կառուցվածքային առանձնահատկությունների առումով էլ նախատեսված չեն լողալու համար. սուր անկյուններ ունեն: Ջրանցքներում ևս չի կարելի լողալ: Այստեղ բացակայում է պատշաճ որակը»,- նշեց մասնագետը:

Նրա բնորոշմամբ`դեկորատիվ ջրավազանները տարատեսակ մանրէներ են պարունակում: «Տարբեր տեսակի կենդանիններ կարող են լողալ այդ ջրավազաններում, որոնք կարող են աղիքային, մաշկային վարակների տարածման աղբյուր դառնալ: Այդ ջրավազանների հարևանությամբ չկան նաև հիգիենայի ապահովվման համապատասխան միջոցներ. չկա հանդերձարան, չկա մարմինը լվանալու տեղ»,- ասաց Բակունցը:

Մասնագետը նշեց նաև, որ բաց կամ բնական ջրամբարներում լողալն էլ կարող է պարունակել վտանգներ: «Լողալու համար նախատեսված վայրերում է պետք լողալ: Խոսքն առաջին հերթին հանրային լողափերի մասին է: Իսկ եթե մարդիկ, այնուամենայնիվ, գնում են ոչ հանրային լողափեր, ապա պետք է շատ զգույշ լինեն, որովհետև այդ տարածքում չկան փրկարարներ:

Հատկապես երեխաների պարագայում առավել զգույշ պետք է լինեն»,- ասաց Բակունցը: Մասնագետը մի քանի խորհորդ տվեց լողափերում լողացողներին. «Անմիջապես երկար լողալ պետք չէ: Ջերմային փոփոխություններին պետք է սովորել: Ջրի ափին պետք է կրկնակի զգույշ լինել, քանի որ կրկնակի են ուլտրամանուշակագույն ճառագայթների ներգործությունը: Պետք է կրել ակնոց, քսուքներ օգտագործել»: Բակունցը տեղեկացրեց նաև, որ իրենք սերտորոեն աշխատում են տարածքային կառավարման մարմինների հետ: