Կարեն Ճշմարիտյանը քննադատեց տնտեսական անկում կանխատեսողներին ու հոռետեսներին

Այսօր կառավարության նախաձեռնած տնտեսական ֆորումում ելույթ ունեցավ ՀՀ էկոնոմիկայի նախարար Կարեն Ճշմարիտյանը: Նա քննադատեց տնտեսության զարգացման հարցում հոռետեսաբար տրամադրված մարդկանց և նշեց, որ մի քանի միջազգային կազմակերպություններ շտապել էին ճշգրտել տնտեսական աճի ցուցանիշները, բայց, նախարարի համոզմամբ, պետք չէր թերագնահատել ներքին կարողությունների դերը:

«Չեմ ուզում տպավորություն թողնել, թե բավարարված ենք աճի տեմպերով, բայց հավելյալ հոռետեսությամբ որևէ արժեք չենք կարող ստեղծել կամ նպաստել տնտեսության զարգացմանը: Շատերի համար քննադատությունը հերոսություն է, իսկ շատերի համար՝ ամենօրյա ծառայությամբ տնտեսությանը օգտակար լինելու աշխատանք»,- ասաց Կարեն Ճշմարիտյանը:

Նա խոսեց աշխարհում տեղի ունեցող քաղաքական-տնտեսական տեղաշարժերի, ինչպես նաև ներքին մարտահրավերների մասին, սակայն, ըստ նախարարի, ներքին ռեսուրսների կենտրոնացմամբ հնարավոր է շատ հարցեր լուծել:

Ճշմարիտյանը նշեց, որ կառավարությունը որդեգրել է ձեռներեցությամբ զբաղվող մարդկանց կողքին կանգնելու ու նրանց աջակցելու քաղաքականությունը, ՓՄՁ-ների նկատմամբ հարկային արտոնությունների, նրանց աջակցելու ռազմավարություն:

«Ոմանք մատնացույց են անում փակված կամ լուծարված ՓՄՁ` մոռանալով մատնացույց անել դրա փոխարեն բացված մի քանի ՓՄՁ-ներին: Ներդրումային վիճակի բարելավման ու զբոսաշրջության զարգացման համար բոլորս ենք պատասխանատու»,- ասաց նախարարը: