Մարդ, ով քննադատեց Եվրոպայի անտարբերությունը. Ժան Ժորեսին արժանվույնս հիշեցին ֆրանսիական համալսարանում

Այսօր Հայաստանի Ֆրանսիական համալսարանը հյուրընկալել էր Ֆրանսիայից ժամանած խորհրդարանականներին: 2014-ը հայտարարված է ֆրանսիացի հասարակական քաղաքական գործիչ Ժան Ժորեսի տարի, և Ֆրանսիայի Սոցիալիստական կուսակցության հիմնադրի մահվան հարյուր ամյակի ոգեկոչման շրջանակներում Հայաստան են ժամանել Ֆրանսիայի խորհրդարանում իշխող մեծամասնություն կազմող Սոցիալիստական խմբակցության պատգամավորները ղեկավար  Բրունո լը Ռուի ղեկավարությամբ:

Նախ Ֆրանսիական համալսարանի ռեկտոր  Ժան Ժակ Մոնտուան նշեց, որ իրենց համար մեծ պատիվ է նման խորհրդանշական առիթով հավաքվելը, քանզի Ժան Ժորեսը խաղաղության ու արդարության մարտիկ էր, ով բարձրաձայնում էր հայ ժողովրդի հանդեպ իրականացրած ոճրագործությունների մասին՝ խստագույնս դատապարտելով նման երևույթները:

Սոցիալիստական խմբակցության ղեկավար Բրունո լը Ռուն իր ելույթում նշեց, որ Ժան Ժորեսը պայքարի կերպար է խորհրդանշում, ով բառի, խոսքի ուժով կառուցեց Ֆրանսիայի հանրապետությունը:

«Ժան Ժորեսը ոչ ասաց բարբարոսությանը՝ պաշտպանելով հայ ժողովրդին: Նա առաջիններից էր, ով դատապարտեց ոչ միայն հայ ժողովրդի նկատմամբ իրականացված ջարդերը, այլ նաև Եվրոպայի անտարբերությունը՝ առաջ քաշելով մարդու հիմնարար ազատություններն ու իրավունքները: Նրա՝ հանուն արդարության մղվող պայքարը մենք ևս պետք է շարունակենք»,- ասաց ֆրանսիացի խորհրարանականը՝ հավելելով, որ վերջերս Ֆրանսիայի նախագահ Օլանդը մի առիթով մեջբերել է հենց Ժան Ժորեսի հայտարարություններից մեկը. «Մարդկությունը չի կարող հանգիստ քնել, քանի դեռ նկուղում սպանված ժողովուրդների դիակներն են»:

Նշենք, որ  Ժան Ժորեսը 1900-1908 թթ. եղել է ՀՅԴ հրատարակած Pro Armenia երկշաբաթաթերթի խմբագրական խորհրդի անդամ: