Նրանք իրենց հերոսների տեղ են դրել. Միքայել Պողոսյան

Դեռ ապրիլի սկզբին դերասան, ռեժիսոր Միքայել Պողոսյանը լրագրողների հետ հանդիպման ժամանակ ասել էր, որ մեր գլխին խուտուտչիների մի տարափ է թափվել ու հավելել. «Գնացել էի «Սուպեր մամա»-ն դիտելու, 15 րոպե հետո փախա դահլիճից»: Սրան հաջորդել էր դերասան, «Սուպեր մամա» կինոկատակերգության պրոդյուսեր Հայկ Մարությանի պատասխանը. «Վերջին տարիներին շատ մտավորականներ փախնում են ոչ միայն դահլիճից, այլ նաև իրականությունից և որն ամենացավալին է ` փախնում են ժողովրդից և թողնում նրան միայնակ ամենածանր պահերին»:

Երկու կողմերի մեկնաբանություններն էլ բազմաթիվ խոսակցությունների տեղիք տվեց, քննարկվեց, մեծ աղմուկ բարձրացավ: Հարցին, թե ինչն էր այդքան մեծ աղմուկի պատճառը` Միքայել Պողոսյանը պատասխանեց, թե բանն այն է, որ նրանք իրենց հերոսների տեղ են դրել, հերոսների կարգավիճակում են ման գալիս. «Փողոցում նրանց այնպես են դիմավորում, ինչպես հերոսներին և նրանք չեն խորանում` ի՞նչն է պատճառը: Իսկ պատճառն էժանագին ծափահարություններ կամ գումար վաստակելու մոլուցքն է, այնքան պարզ բան է, որ դրա մասին խոսելն անիմաստ է: Եվ հետո` մի երկու անգամ էլ, որ քաղաքական ակցիաների են մասնակցում, իրենց թվում է` արդեն վերջնական ներդաշնակության են հասել»: