Քարդաշյանները ղեկավարում են ցեղասպանության պնդումների գլոբալ քարոզչությունը. թուրքական Korhaber

Թուրքական կայքերը շարունակում են անդրադառնալ Քիմ Քարդաշյանի և նրա ընտանիքի անդամների` Հայաստան այցին:

Korhaber կայքը «Էրզրումցի Քարդաշյանները՝ Հայաստանում» վերնագրված հոդվածում հայտնել է, որ Քարդաշյանը, ամուսնու, դստեր և քրոջ հետ ապրիլի 24-ի՝ «Ցեղասպանության պնդումների» 100-րդ տարելիցի միջոցառումներին ընդառաջ` վավերագրություն տեսագրելու համար մեկնել է Հայաստան, ինչը սենսացիա է դարձել:

«Հայաստանում «քարի քարին չթողնող» Քարդաշյանը, ամուսնու՝ Քանյե Ուեսթի, քրոջ՝ Քլեոի հետ ցնցել է Հայաստանը»,- գրել է կայքը՝ հավելելով, թե հայ արմատներով Քարդաշյանները, իբր, դժվարացել են քայլել փողոցներում:

Կայքը նաև ապատեղեկատվություն է տարածել` նշելով, որ Քարդաշյաններն այցելել են Ցեղասպանության հուշահամալիր (դեռ չեն այցելել) և այլ տեսարժան վայրեր, որի ընթացքում հազարավոր մարդիկ հերթ են կանգնել նրանց հետ լուսանկարվելու համար:

«Այսպիսով՝ մինչ Քարդաշյանները, որոնց հետևում է միջազգային մամուլը, ղեկավարում են Հայաստանի՝ ցեղասպանության պնդումների 100-րդ տարելիցի շատ մեծ գլոբալ քարոզչությունը, համաշխարհային մամուլում տեղ է գտել նրանց տոհմածառը՝ Էրզրումից սկսած»,-եզրափակել է կայքը: