Կանխարգելող քարոզչությունը մեծացնում է ցեղասպանության մասին իրազեկվածությունը, կանխում հերքումը

ՀՅԴ ԱՄՆ Հայ դատի հանձնախմբի հանձնախումբը` ներառյալ Արևելյան և Արևմտյան շրջանները, համագործակցելով ցեղասպանությունների ճանաչման և կանխարգելման համար պայքարող իրավապաշտպան կազմակերպությունների հետ, իրականացրել է հաջողված արշավ, որի շրջանակում ԱՄՆ բոլոր 50 նահանգներում գործող ավելի քան 120 առաջատար լրատվամիջոցների կոչ է արել զրոյական հանդուրժողականության քաղաքականություն վարել մարդկության դեմ զանգվածային բնաջնջումների ու հանցագործությունների, մասնավորապես` Հայոց ցեղասպանության հերքման դեմ: Այս մասին տեղեկացնում է ԱՄՆ Հայ Դատի հանձնախումբը:

Արշավի մասնակիցները նամակներով դիմել են լրատվամիջոցներին`պահանջելով իրենց հրապարակումները ցեղասպանության հերքման քարոզի հարթակ չդարձնել:

Արշավն իրականացվել է  2016 թվականից: Այն ոչ միայն հանրության շրջանում բարձրացրել է Հայոց ցեղասպանության մասին իրազեկվածության մակարդակը, այլև բարեհաջող կերպով կանխել ԶԼՄ-ներում այս պատմական փաստի հերքման վերաբերյալ նոր հրապարակումների երևան գալը:

Հավելենք, որ ԱՄՆ Հայ Դատի հանձնախմբի Արևմտյան շրջանի գրասենյակի նախագահ Նորա Հովսեփյանն իր շնորհակալությունն է հայտնել ստեղծված կոալիցիայի իր բոլոր գործընկերներին՝ Ցեղասպանության հերքման դեմ քայլեր ձեռնարկելու համար:

Հիշեցնենք, որ 2019 թվականին նոր կոալիցիա է ստեղծվել, որը ներառում է  հունական, կիպրական, հրեական և այլ ազգային 19 կազմակերպություն: