Ֆրանսիայում նիհարությունը պաշտոնապես ճանաչվեց ոչ նորաձեւ

Ֆրանսիայի խորհրդարանի Ստորին պալատը ձայների մեծամասնությամբ ընդունել է առողջապահության նախարարության սահմանած` քաշի թույլատրելի նվազագույն շեմից անցած մոդելներին աշխատել արգելող օրենք:

Չափազանց նիհար մոդելները չեն կարողանա պոդիում դուրս գալ, իսկ այն գործակալությունները, որոնք կաշխատեն նման աղջիկների հետ, կտուգանվեն մինչև 75 հազար եվրոյով կամ կդատապարտվեն կես տարվա ազատազրկման։ Քաշի ինդեքսը որոշվում է մարմնի քաշի (կիլոգրամներով) եւ հասակի քառակուսու (մետրով) հարաբերակցությամբ:

Աշխատանքի ընդունվելու համար աղջիկները պետք է բժշկից հատուկ տեղեկանք ներկայացնեն, որ համապատասխանում են քաշի սահմանված ինդեքսին, որը չպետք է 18-ից ցածր լինի:

Բժիշկների խոսքով` եթե ձեր քաշի ինդեքսը տատանվում է 18.5-ից 24.9-ի միջակայքում, ձեզ կարելի է համարել առողջ:

Նշենք, որ Ֆրանսիայում 40 հազար մարդ տառապում է անորեքսիայով: