Մեկ տարեկան երեխային վերև շպրտեցին և մերկացրած սրով որսացին

Աղբյուրը՝ armeniangenocide100

Սաթենիկ Հակոբյանի պատմությունը

1896 թ., Կարս

Սիրանույշ Պետրոսյանն ArmenianGenocide100.org-ին է ուղարկել իր տատի մոր՝ գեղեցկուհի Սաթենիկի պատմությունը: Թուրքերը նրա աչքի առաջ մեկ տարեկան երեխային վերև են շպրտել և մերկացրած սրով որսացել: Երիտասարդ որդուն մորթել են, իսկ տարեց հորը ստիպել խմել որդու արյունը… Այնուհետև արնախում գազանն անպաշտպան կնոջն այնքան է ծեծել, մինչև համոզվի՝ անշնչացել է:

«Տատիս հիշողություններն այնքան են տպավորվել իմ մեջ, որ երբեմն ինձ թվում է,թե տեսել եմ նրա մայրիկին՝ գեղեցկուհի Սաթենիկին: Այդ օրը, երբ գեղեցկուհի կինն ընդառաջ գնաց ամուսնուն, նա նման չէր իրեն:

-Սաթենիկ,պետք է դիմանաս , ես քեզ ոչ ոքի չեմ տա…

Եվ ամուսինը շիկացած ակիշով վերքեր բացեց Սաթենիկի դեմքին:

-Սիրուն է գյավուրը,դիտմամբ է արել,- ֆշշացրեց թուրքը և ծամերից բռնած քարշ տվեց Սաթենիկին:

Հետո նրա աչքի առաջ սկսվեց գազանային սպանդը: Մեկ տարեկան երեխային վերև շպրտեցին և մերկացրած սրով որսացին:

Երիտասարդ որդուն մորթեցին, իսկ տարեց հորը ստիպեցին խմել որդու արյունը…

Մի քանի ժամ տևած սարսափն ու ցավը վիրավոր գազանի էին վերածել նաև Սաթենիկին, և նա ճանապարհին ամբողջ ուժով կծեց թուրքի մատը: Համարյա կտրված մատը ստիպեց թուրքին մոռանալ Սաթենիկին, իսկ երբ ցավն արդեն կառավարելի էր, Սաթենիկին գտավ հարազատների դիակների վրա ողբալիս…

Արնախում գազանն անպաշտպան կնոջն այնքան ծեծեց, մինչև համոզվեց, որ արնաշաղախ կինն անշնչացել է: Սաթենիկ տատը ինքն էլ չգիտեր, թե ինչքան է մնացել անգիտակից, միայն հիշում է, որ երբ ուշքի է եկել, հարազատների անթաղ դիակներն արդեն նեխած էին: Հրաշքով փրկված Սաթենիկ տատը թուրքի ծեծից հետո հաշմվել էր և կորցրել լսողությունը, բայց կարողացել էր հասնել Արևելյան Հայաստան և նոր ընտանիք կազմել: Եվ ամեն անգամ Եղեռնի մասին խոսելիս ասում էր. «Անեծքի բաժին դառնան…»