Ամանորյա գնումներից հետո նախարարի գրպանում մնացել է 635. 821 դրամ

Yerkir.am-ի հումորային բլից հարցերին պատասխանում է ՀՀ Քաղաքաշինության նախարար Նարեկ Սարգսյանը:

-Ամանորի գիշերը շա՞տ խմեցիք:

-Ջերմուկ՝ այո:

-Քանի՞ բաժակից եք հարբում:

-Ջերմուկի ջրից չեմ հարբում, բայց բնությունից՝ այո:

-Ի՞նչն է օգնում դուրս գալ խումարից:

-Ձեր հարցերը:

-Ամենաուրախ, ամենահիշվող Նոր տարին:

-1992 թվականին, Մոսկվա-Մարսել ինքնաթիռի մեջ:

-Իսկ ամենատխուրը:

-2011 թվականի Նոր տարին:

-Ամենաթանկ ամանորյա նվերը (գումարի առումով), որ ստացել եք:

-Գումարը չի հետաքրքրել:

-Ամենաօրիգինալ նվերը:

-Փոքր որդուս ձեռքով պատրաստված նվերը:

-Տոնը ստացված է, երբ...

-Ինձ թույլատրում են գնալ աշխատելու:

-Առանց ինչի՞ չեք պատկերացնում Ամանորի սեղանը:

-Մանդարինի:

-Ձեր հանդիպած ամենատպավորիչ Ձմեռ պապը:

-Ես՝ ինքս, եղել եմ Ձմեռ պապ, երբ երեխաները շատ փոքր էին:

-Ձմեռ պապն առանց Ձյունանուշի, ինչպես …

-Կառավարության շենքն՝ առանց թմբուկի…

-Ամանորյա գնումներից հետո, մինչեւ հաջորդ աշխատավարձը, գրպանում գումար մնա՞ց:

- 635. 821 դրամ:

-Հետևեցի՞ք, թե ով որքան կերավ Ձեր՝ Նոր տարվա սեղանից:

-Նրանք կերան մի քանի բլիթ, դատարկեցին ափսեի ողջ ձիթապտուղը, հետո անցան ընդեղենին, կերան մի քանի կտոր խմորեղեն, խմեցին 5 գավաթ կոնյակ, բայց դե, ո՞վ է հաշվում…

-Ամանորի սեղան գցելու գործում Ձեր բաժինը:

-Զրոյական:

-Եղա՞ն մարդիկ, որ մտքում հաշվեցին Ձեր ամանորյա սեղանի արժեքը:

-Դատելով նրանց դեմքի խորը հիասթափությունից` այո…

-Միջինը քանի՞ բոնբոներկա եք նվիրում հյուր գնալիս:

-Հինգ:

- Ձեզ նվեր բերված բոնբոներկան քանի՞ անգամ եք ուրիշին նվեր տարել:

-Միշտ:

-Ինչպե՞ս կարելի է ապրել մարդավարի, եթե յուրաքանչյուր տարի որևէ կենդանու տարի է:

-Կենդանիներն ամենաազնիվ արարածներն են:

-Ոչխարից (այս տարի այդ կենդանակերպի տարին է) ի՞նչ ակնկալիքներ ունեք:

-Փոքր որդիս ծնվել է ոչխարի տարում, և դա ինձ հաճելի է: