Գուրգեն Խանջյանի «Արտավազդ-Շիդար» պիեսի բեմադրության պրեմիերան` դեկտեմբերի 19-ին

Այս տարի Սոս Սարգսյանի անվան պետական համազգային թատրոնը 3 պրեմիերա է ունեցել, 4-րդը տեղի կունենա դեկտեմբերի 19-ին: Այս մասին լրագրողների հետ հանդիպման ժամանակ նշեց թատրոնի տնօրեն Վարդան Մկրտչյանը:

Դեկտեմբերի 19-ին կներկայացվի Գուրգեն Խանջյանի «Արտավազդ-Շիդար» պիեսը, որը դեռ 2013-ին Համազգային հայ կրթական եւ մշակութային միության կողմից կազմակերպված «Լեւոն Շանթ» թատերգության մրցանակաբաշխության ժամանակ ճանաչվել էր լավագույն պիես: Բեմադրության հեղինակը Արմեն Մեհրաբյանն է:

Մինչ այդ թատրոնը բեմադրել էր Շեքսպիրի «Համլետը», Դանիել Խարմսի «Любовь» և Ռեյ Կունի «Ծիծաղելի փողեր» պիեսի հիման վրա բեմադրված «Ջեք-փոթ» ներկայացումները:

Մկրտչյանի հավաստմամբ` 2014-ը ստեղծագործական առումով չգերազանցված տարի էր, սակայն մի շարք անելիքներ կիսատ մնացին` շենքային պայմաններից ելնելով:

«Մենք չկարողացանք նախատեսված ներկայացումների քանակն /125/ ապահովել, հիմնական խոչընդոտը թատրոնի շենք չունենալն էր: 23 հոգանոց թատերախումբ ունեցող թատրոնի համար նման պայմաններում դժվար է ապահովել և՛ պրեմիերաներ, և՛ ակտիվ պահել խաղացանկային ներկայացումները»,- ասաց Մկրտչյանը:

Նա նշեց նաև, որ 2014-ին թատրոնն այդպես էլ հյուրախաղերի չմեկնեց, սակայն 2015-ը սկսելու են հյուրախաղերով` փետրվարի սկզբին թատրոնը «Ամենալավ տունը», «Փրկության կղզի», «44 աստիճանի վրա» ներկայացումներով կմեկնի հյուրախաղերի` Լոս Անջելես և Սան Ֆրանցիսկո: