Ոսկե մեդալ՝ Արա Գևորգյանին՝ «ֆիզիկական կուլտուրայի եւ սպորտի ոլորտում ունեցած մեծ ներդրման համար»

ՀՀ սպորտի եւ երիտասարդության հարցերի նախարար Գաբրիել Ղազարյանը ֆիզիկական կուլտուրայի եւ սպորտի ոլորտում ունեցած մեծ ներդրման համար, նախարարության «Բացառիկ ծառայությունների համար» ոսկե մեդալով պարգեւատրել է Հայաստանի Հանրապետության վաստակավոր արտիստ, երգահան եւ երաժշտական պրոդյուսեր Արա Գեւորգյանին:

«Ես` որպես սպորտի ներկայացուցիչ, գիտեմ, թե որքան ոգեւորիչ կարող է լինել երաժշտությունը, որի տակ մեր մարզիկները ելույթ են ունենում: Կարող եմ նշել բազմաթիվ օրինակներ, երբ ձեր ստեղծագործությունների տակ են նրանք հաղթել» – հանդիպման ժամանակ ասել է Գաբրիել Ղազարյանը:

Արա Գեւորգյանը շնորհակալություն է հայտնել նախարարին պարգեւի համար՝ նշելով, որ այն պարտավորեցնող է, եւ ինքը հետագայում էլ կշարունակի իր երաժշտությամբ ազգային հայրենանվեր գաղափարներ սերմանել՝ նպաստելով մեր մարզիկների նոր մարզական նվաճումներին: Այս մասին տեղեկացնում է ՀՀ սպորտի և Երիտասարդության հարցերի նախարարության պաշտոնական կայքը: