Ծիրաններն օրհնված են. մեկնարկեց «Ոսկե ծիրան» կինոփառատոնը

Քիչ առաջ Երևանի Սբ Գրիգոր Լուսավորիչ եկեղեցում Ծիրանօրհնեքի արարողությամբ տրվեց «Ոսկե ծիրան» երևանյան 11-րդ միջազգային կինոփառատոնի մեկնարկը:

Լրագրողների հետ զրույցում փառատոնի հիմնադիր նախագահ Հարություն Խաչատրյանը նշեց, որ Ծիրանօրհնեքը դարձել է հայկական սովորույթ, և աշխարհը սկսում է ճանաչել մեր թե՛ կրոնական, թե՛ ժողովրդական սովորույթները:

« «Ոսկե ծիրանը» միայն կինոփառատոն չէ, այլ` սեր, որը մեր ժողովուրդը տալիս է իր հյուրերին: Ես հարյուրավոր փառատոների եմ եղել և վստահորեն կարող եմ ասել, որ այսպիսի ջերմությամբ ոչ մի քաղաքում չեն դիմավորել հյուրերին, ոչ մեկը նման սովորություն չունի, և մեզ պես հյուրասիրություններ չեն անում: Պետք է հյուրերին մեր բարեկամներն ու դեսպանները դարձնենք, քանի որ մենք այդ սիրո կարիքն ունենք: Մեզ ատելությամբ շատ են շրջապատել մեր հարևան երկրները, այդ ատելությունը մենք պետք է սիրով ավարտենք»,-ասաց Խաչատրյանը:

Տեր Անուշավան եպիսկոպոս Ժամկոչյանն էլ նշեց, որ «Ոսկե ծիրանը» տոն է մեր մայրաքաղաքի համար, քանի որ այս օրերին մեր ժողովուրդն առիթ է ունենում դիտելու բազմաթիվ բարձրարվեստ ֆիլմեր` նվիրված տարբեր երկրների ու ժողովուրդների սովորույթներին, հասարակական կյանքում առկա խնդիրներին:

«Հայ հանդիսատեսին առիթ է ընձեռվում հաղորդակցվելու ժամանակակից կինոարվեստի ձեռքբերումներին ու զարգացման հեռանկարներին: Ողջունելի է այն փաստը, որ կինոփառատոնը խրախուսում է հատկապես երիտասարդ կինոգետներին ու ռեժիսորներին: Փառատոնը լուրջ ներդրում է բերում կինոարվեստի զարգացման գործին»,- ասաց Տեր Անուշավան եպիսկոպոս Ժամկոչյանը: