Հայաստանը դուրս է մնում էներգետիկ գործընթացներից. պատգամավորներն անհանգստացած են

Այսօր ԱԺ տնտեսական հանձնաժողովի նիստում, երբ քննարկվում էր «Խաղաղ նպատակներով ատոմային էներգիայի անվտանգ օգտագործման մասին» ՀՀ օրենքում լրացում եւ փոփոխություն կատարելու մասին հարցը, հիմնական զեկուցող` ՀՀ կառավարությանն առընթեր միջուկային անվտանգության կարգավորման պետական կոմիտեի նախագահ Աշոտ Մարտիրոսյանին հարց ուղղեց ԱԺ ԲՀԿ խմբակցության պատգամավոր Միքայել Մելքումյանը, թե ինչո՞ւ Հայաստանն ակտիվ չէ միջազգային կառույցների հետ այս ոլորտում ինտեգրացիոն գործընթացներում: Նա նշեց, որ Ադրբեջանը պատրաստվում է 20 միլիարդ դոլար ներդնել` նոր ատոմակայան բացելու նպատակով: Իսկ Հայաստանը դուրս է մնում միջազգային էներգետիկ զարգացման գործընթացներից` չինտեգրվելով դրանց:

Աշոտ Մարտիրոսյանը նախ նշեց, որ հարցն ավելի շատ ուղղված է ՀՀ էներգետիկայի նախարարությանը, իսկ իրենք միայն անվտանգությամբ են զբաղվում: 

Իսկ ԱԺ պատգամավոր Հրանտ Բագրատյանը հարց բարձրացրեց այն մասին, որ Հայաստանի ատոմակայանի փակման պահանջով թղթերը Ադրբեջանի կողմից համառորեն ուղարկվում են եվրոպական կառույցներ: «Ես մեկ-մեկ նույնիսկ վախենում եմ, որ էս ԵվրԱզԵՍ-ն էլ դեմ լինի սրան: Ինչի՞, օրինակ, պարբերաբար հայտարարություններով չեք պատասխանում: Մենք չենք կարողանում Եվրամիությունում, Եվրանեսթում պայքարել էդ ալիքի, էդ թափի դեմ: Արդեն ընդունված բան ա, որ իբր Հայաստանում «խուլիգան» ատոմակայան կա, որը Չեռնոբիլի տիպի ա»,- ասաց նա:

Աշոտ Մարտիրոսյանը նշեց, որ իրենց կոմիտեն վաղուց է համագործակցում մասնագիտացված միջազգային կազմակերպությունների, այդ թվում` ՄԱԳԱՏԷ-ի (ԱԷՄԳ), ինչպես նաև ԱՄՆ, ՌԴ եւ այլ երկրների հետ, որոնք ունեն ատոմակայաններ: Ըստ նրա` ոչ մի կազմակերպությունում Ադրբեջանը կամ Թուրքիան հարց չեն բարձրացնում, որ պետք է Հայկական ատոմակայանը փակվի:

«Մի փոքր ելույթ ունեցան Ադրբեջանի ներկայացուցիչները, որ Հայաստանի թափոնները տանում են, Ղարաբաղում են թափում, բայց ՄԱԳԱՏԷ-ից անմիջապես տնօրենի մակարդակով արձագանքեցին, որ նրանք հիմարություն են ասում, բոլորը գտնվում է ՄԱԳԱՏԷ-ի հսկողության տակ, և նման բան չի կարող լինել»,- ասաց Մարտիրոսյանը` հավելելով, որ ո'չ ԱԷՄԳ-ում, ո'չ ԵՄ-ում այդ խնդիրը նրանք չեն բարձրացրել: Նման հարցեր միայն ԶԼՄ-ներում են բարձրացնում:

«ԵՄ-ում` կարևորագույն կառույցներից մեկում, անձամբ ես եմ պայքարել: Դուք ասում եք` չէ, ես էլ ասում եմ, որ տենց չի»,- արձագանքեց Բագրատյանը:

Տեսակետին, թե իրականում հին է մեր ատոմակայանը, և ինչքան էլ անվտանգությունն ապահովեն, մետաղը չեն կարող փոխել, Բագրատյանը պատասխանեց. «Ես դա շատ լավ հասկանում եմ, մետաղը կարող է հոգնել և այլն, բայց, համենայն դեպս, ատոմակայանը չի համարվում վտանգավոր, սակայն ես տեսնում եմ վտանգ` Հայաստանին զրկել ատոմային էներգետիկայից»: