ԱԺ նախագահը պետք է լինի մաքուր, անապական կենսագրությամբ. Տաճատ Վարդապետյան

ԱԺ ՀՀԿ խմբակցության պատգամավոր Տաճատ Վարդապետյանը համարում է, որ ՀՀ  արտգործնախարարի ու պաշտպանության նախարարի վերանշանակման հարցում հաշվի է առնվել նորանշանակ վարչապետւ կարծիքն ու վերաբերմունքը, և որ Հովիկ Աբրահամյանն ու Սերժ Սարգսյանը համատեղ են որոշել նրանց վերանշանակումը:

Yerkir.am-ի հետ զրույցում, խոսելով ապագա կառավարության կազմի մասին, նա կարծիք հայտնեց, որ նոր կառավարության աշխատանքի արդյունավետությունը կբարձրանա,  քանի որ արժանի վարչապետ է նշանակվել: Տաճատ Վարդապետյանը լուրջ ակնկալիքներ ունի, որ Հովիկ Աբրահամյանի  կառավարման ժամանակ Հայաստանն առաջընթաց է ունենալու, և որ Հովիկ Աբրահամյանն անելու է ամեն ինչ, որ երկրում բարեփոխումներ իրականացվեն: «Ունենք հարուստ կադրային բազա, այնպես որ` նոր վարչապետը ճիշտ և հեռատես ընտրություն կկատարի կառավարությունը ձևավորելիս»,- ասաց Տաճատ Վարդապետյանը:

Մերհարցին` ո՞ւմ է տեսնում ԱԺ նախագահի պաշտոնում, Տաճատ Վարդապետյանը պատասխանեց. «ԱԺ նախագահի թեկնածուների հետ կապված` նույնպես կադրային հարուստ զինանոց ունենք, և ԱԺ նախագահ պետք է ընտրվի մի մարդ,  ով ունի մաքուր անապական կենսագրություն, քաղաքական ազնվություն, լավ դաստիարակություն և քաղաքական կենսագրությամբ` օրինակելի»:

Հարցին` արդյո՞ք ներկայիս քաղաքական դաշտում կա նման մարդ, պատգամավորը պատասխանեց. «Իհարկե, կա, այո, կա»:

Ըստ պատգամավորի` Հովիկ Աբրահամյանին փոխարինողը պետք է օժտված լինի նրա պես` սուր անկյունները հարթելու ունակությամբ և ընդունված ու հարգված լինի խորհրդարանի կողմից:

Հարցին` արդյո՞ք տեսնում է ՕԵԿ-ին  ընդդիմության մեջ, Վարդապետյանը պատասխանեց, որ այդ հարցին չի կարող միանշանակ պատասխանել, քանի որ եղել է ժամանակ, որ ՕԵԿ-ը նաև ընդդիմություն է եղել: «Դա իրենց որոշելիքն է ու իրենց քաղաքական դիրքորոշման հարցն է»,- ասաց պատգամավորը: