Հայ օլիմպիականների ժամանակացույցը

Հայաստանի ազգային օլիմպիական կոմիտեն  հունվարի 21-ին Միջազգային օլիմպիական կոմիտեին է ուղարկել Սոչիում կայանալիք 2014թ. ձմեռային օլիմպիական խաղերին մասնակցող Հայաստանի մարզիկների և  մարզիչների պաշտոնական անվանացանկը, ինչպես նաև  հայ մարզիկների ժամանակացույցը:

Դահուկորդ Սերգեյ Միքայելյանը փետրվարի 9-ին՝ ժամը 14-16-ը կմրցի 15+15 կմ մրցավազքում (սկիաթլոն):

Փետրվարի 11-ին՝ նույն ժամերին, Սերգեյը հանդես կգա արագավազքում: Փետրվարի 14-ին 15 կմ դասական ոճում և փետրվարի 23-ին՝ ժամը 11-ին, նա կսկսի 50 կմ ազատ ոճի դահուկավազքը, որը կտևի մոտ երեք ժամ:

Նույն օրերին և ժամերին մրցահարթակ դուրս կգա նաև Արթուր Եղոյանը, ով հայտավորված չէ 50 կմ տարածությունում:  

Կանանց մրցաշարում Կատյա Գալստյանը փետրվարի 13-ին՝ ժամը 14:00-ից 15:40-ը կմրցի 10 կմ դասական ոճի դահուկավազքում:

Լեռնադահուկորդ Արման Սերեբրակյանը փետրվարի 19-ին հանդես կգա հսկա ոլորավայրէջքում, իսկ փետրվարի 22-ին` հատուկ ոլորվայրէջքում: Նրան մրցավայր կուղեկցի ծաղկաձորցի մարզիչ Սեյրան Հարությունյանը:

Մրցաձևերը կանցկացվեն երկու մրցահերթով (կեսօրին և երեկոյան):

Սոչի-2014-ի ծրագրում ընդգրկված է 15 մարզաձև: Կխաղարկվի մեդալների 98 հավաքածու:  Հայտավորված են 80 երկրների մոտ 5500 մարզիկ-մարզուհիներ: Միջոցառումը լուսաբանելու համար հավատարմագրված է 12 հազար լրագրող: Կազմկոմիտեի աշխատանքներին կօժանդակի 25 հազար կամավորական, իսկ մրցումների ընթացքին կհետևի մոտ երեք միլիարդ հեռուստադիտող: 

Հայաստանի մարզիկները ձմեռային օլիմպիական խաղերում առաջին անգամ ներկայացել են 1994 թվականին Լիլեհամերում, ապա մասնակցել են Նագանոյի (1998թ.), Սոլթ Լեյք Սիթիի (2002թ.), Թուրինի (2006թ.) և Վանկուվերի (2010թ.) խաղերին: