ՈՒԵՖԱ-ի լեզուն էլ ֆրանսերենն է, հիմա Ռուբեն Հայրապետյանը ֆրանսերենի՞ մասնագետ է. Ալեքսանդր Արզումանյան

ԱԺ-ում կառավարությանն ուղված հարցուպատասխանի ժամանակ ԱԺ «Ժառանգություն» խմբակցության պատգամավոր Ալեքսանդր Արզումանյանը հարց ուղղեց ՀՀ վարչապետին: Նա նշեց, որ «Դեմ ենք օտարալեզու դպրոցների վերաբացմանը» նախաձեռնությունը, որը պայքարում է հայերեն լեզվի կասեցման դեմ ներկայացրել է հերթական բողոքը, թե ինչու է «Ինչ, որտեղ, երբ» խաղը հեռարձակվում ռուսերենով: «Խնդիրն այն է, որ դուք դա չեք պայմանավորում խաղը հայերեն անցկացնելու պահանջով: Այսինքն` անհրաժեշտ է տեղայնացնել միջազգային հեռուստատեսային նախագծերը»,- ասաց նա:

Հարցին պատասխանեց ՀՀ կառավարության աշխատակազմի ղեկավար-նախարար Վաչե Գաբրիելյանը: Նա նշեց, որ պետք է տարանջատել խաղը ինտելեկտուալ շարժմանը աջակցելուց: Վերջինի հետ կապված միջոցառումներն անցկացվում են հայերեն լեզվով: Ինչ վերաբերում է խաղին, ապա դրա աշխատանքային լեզուն ռուսերենն է, խաղի այդ մի կտորը ռուսերենով է: «Ռադիոյի և հեռուստատեսության մասին օրենքի համաձայն կա դրույթ, որ ազգային փոքրամասնությունների համար թույլ է տրվում հեռաձայնել հաղորդումը այլ լեզվով»,- ասաց Վաչե Գաբրիելյանը:

«Փոքրամասնությունը հայե՞րն են: Բայց դուք խաղ եք խաղում, ու հայկական թիմերը խաղում են Հայաստանի տարածքում ու մեկը մյուսի հետ խաղում են այլ լեզվով: Գնացեք դուրս, խաղացեք ռուսերենով, եկեք մեզ մոտ, խաղացեք հայերենով: ՈՒԵՖԱ-ի լեզուն էլ ֆրասներենն է, հիմա Ռուբեն Հայրապետյանը ինչ… ֆրանսերենի՞ մասնագետ է»,- նշեց Ալեքսանդր Արզումանյանը: