Էսօր կանք, էգուց չկանք, դրա տակ ճկռելու են մեր երեխաները. Ալեքսանդր Արզումանյան

ԱԺ «Ժառանգություն» խմբակցության պատգամավոր Ալեքսանդր Արզումանյանը, խոսելով գազային պայմանագրերի ուսումնասիրման համար հնարավոր ստեղծվելիք հանձնաժողովին, նշեց, որ այստեղ հարցն այն չէ, թե ում համար է պատիվ ինչ-որ մեկի մեկնած ձեռքը ընդունել, հարցն այն պարտավորությունների ստանձնումն է, որ կա ընտրողների առջև:

Ալեքսանդր Արզումանյանը ողջունում է հանձնաժողով ստեղծելու նախաձեռնությունը: «Մեզ հետաքրքրում է մեր քաղաքացու վճարելիք գազի գինը, մեզ հետաքրքիր չէ, մեր գործը չէ, թե որքանով է գնում «Գազպրոմը» այդ գազը Ռուսաստանից»,- ասաց պատգամավորը՝ հավելելով, որ գազային պայմանագրերը կնքվել են 20-րդ դարի փիլիսոփայությամբ, երբ գազի գինը կապվում էր նավթի գնի հետ, սակայն ամբողջ աշխարհն է հրաժարվել այդ փիլիսոփայությունից: Գինը պետք է ձևավորվի ստեղծված իրավիճակից բխող շուկայական հարաբերություններից:

«Այս հեռանկարում այդ պայմանագրերը չեն բխում մեր երկարաժամկետ շահերից: Հանձնաժողովը պետք է կարգավորի, թե ինչքանով է գազը վաճառելու քաղաքացիներին: Եկեք` միասնաբար քննարկենք, մեծամասնությունն էլ գուցե գիտակցի դա, ու կարողանանք դուրս գալ այս վիճակից: Որովհետև դա մեր բոլորի խնդիրն է, մեզ խաբել են ու ստորագրել են տվել այդ պայմանագիրը: Էսօր կանք, էգուց չկանք, դրա տակ ճկռելու են մեր երեխաները»,- ասաց Ալեքսանդր Արզումանյանը:

Պատգամավորի ելույթին արձագանքեց ԱԺ նախագահ Հովիկ Աբրահամյանը՝ ասելով. «Մինչ Ձեր ելույթը դրականորեն էի տրամադրված` այս հանձնաժողովի քվեարկման հետ կապված, բայց հիմա բացասական եմ տրամադրված, ու դեմ ենք քվեարկելու այդ նախագծին»:

Նշենք, որ լրագրողների հետ զրույցում ավելի վաղ ՀՀԿ խմբակցության ղեկավար Գալուստ Սահակյանն արդեն հայտնել էր, որ ՀՀԿ-ն դեմ է քվեարկելու այդ հանձնաժողովի ստեղծմանը: