Առաջարկում են օնլայն հեռարձակել Երևանի ավագանու նիստերը

Երեւանի ավագանու «Բարեւ Երեւան» խմբակցության անդամներ Ա. Բախշյանը, Ս. Սաֆարյանը, Գ. Բաղդասարյանը նոյեմբերի 11-ին շրջանառության մեջ են դրել որոշման նախագիծ` Երեւանի ավագանու Կանոնակարգում փոփոխություններ ու լրացումներ կատարելու մասին:

Նախագծով առաջարկվում է քաղաքապետարանի պաշտոնական կայքում հեռարձակել Երեւանի ավագանու հրապարակային նիստերը: Առցանց հեռարձակումը թեեւ չի կարող փոխարինել քաղաքացիների՝ ավագանու նիստերին ֆիզիկապես մասնակցելու օրենքով ամրագրված իրավունքին, այդուհադերձ այդ իրավունքի մասնակի իրացման գրավական է: Առցանց հեռարձակումը նաեւ կնպաստի ավագանու աշխատանքների թափանցիկությանը, դրանց նկատմամբ հանրության ուշադրության ավելացմանը:

Որոշման նախագծի հաջորդ կետով առաջարկվում է Երեւանի քաղաքապետի կնքած ու ավագանու կողմից վավերացման ենթակա պայմանագրերի շարքին դասել հանրային ծառայությունների ոլորտում քաղաքապետի եւ ֆիզիկական ու իրավաբանական անձանց միջեւ կնքվող պայմանագրերը: Ներկա դրությամբ Երեւանի բնակչությանը մատուցվող բազմաթիվ ծառայությունների դեպքում քաղաքապետի ու իրավաբանական անձանց միջեւ կնքված եւ կնքվող պայմանագրերը շրջանցում են ավագանու ինստիտուտը, ինչը ծնունդ է տալիս հարցերի եւ կասկածների, ինչպես օրինակ վճարովի ավտոկայանատեղիների կազմակերպման «Փարքինգ սիթի» ՓԲԸ-ի հետ քաղաքապետի կնքած պայմանագիրը:

Ի դեպ երկու առաջարկներն էլ բխում են ոչ միայն իրավիճակից, այլեւ  նախատեսված են եղել «Բարեւ Երեւան» դաշինքի նախընտրական ծրագրով: