"Սիգարոնը" նորից կսկսի աշխատել

Կառավարության այսօրվա նիստի ժամանակ ՀՀ էկոնոմիկայի նախարար Վահրամ Ավանեսյանը հայտնեց, որ «ՍՊՍ Սիգարոն» ընկերությունից ստացել է համապատասխան տեղեկանք, ըստ որի` առաջիկա երկու ամիսների ընթացքում նախատեսվում է, որ ընկերությունը կսկսի իր նախնական արտադրանքի թողարկումը: Խոսքը հանրահայտ «Սիգարոն» ծխախոտներն արտադրող ընկերության մասին է, որը տեւական դադարից հետո պետք է վերսկսի իր աշխատանքները:

Նախնական թողարկված արտադրանքը, ինչպես նշեց Վահրամ Ավանեսյանը, արտահանվելու է:

Կառավարությունն էլ իր այսօրվա նիստի ժամանակ որոշեց մինչեւ 2014 թվականի մայիսի 5-ը երկարաձգել ընկերության կողմից «Ժամանակավոր ներմուծում` վերամշակման համար» մաքսային ռեժիմով Հայաստանի Հանրապետություն ներմուծված եւ չվերարտահանված ապրանքների նկատմամբ կիրառված «Ժամանակավոր ներմուծում` վերամշակման համար» մաքսային ռեժիմը: