Երևանյան ռապսոդիա

Երևանյան ռապսոդիա

Սա Երևանն է, ցամաքած ցայտաղբյուրների մայրաքաղաքը,

որտեղ նախկինում ջուրը կյանք էր իսկ հիմա` փող,

որտեղ նախկինում ջուրը ջուր էր, իսկ հիմա նաև «Ջուր kid's»,

որտեղ նախկինում այգին զբոսայգի էր` լիներ կոմայգի, թե մանկական`

իսկ հիմա տրանսսեքսուալներն են հավաքվում:

Սա Երևանն է,

որտեղ բազում երթուղիներով քաղաքում մնացել են միայն գծերն ու գծատերերը,

ովքեր նաև պատգամավորներ են կամ վարչության պետ:

Սա Երևանն է.

 Նախկինում այստեղ լսում էին Հովհաննես Բադալյան, ...նաև Զեյնաբ Խանլարովա:

 Ի դեպ վերջինիս երկրպագուներն էլ դարձան վերնախավ և աճեցին` հիմա լսում են Թաթուլ, Իբրահիմ, սպիտակցի Հայկո...

Մի խոսքով` սա Երևանն է,

որը սարքեց Մենուայի որդի Արգիշտին,

իսկ հիմա այդ հինավուրց քաղաքի սրտում փառավորված բազմել է պատգամավորի գազալցակայանը:

Սա Երևանն է,

գազալցակայանների բենզալցակայանների, սուպերմարկետների, որ նախկինում գաստրոնոմ էին կոչվում,  հրաշալի նկարիչների, գրողների, դերասանների, ովքեր էլ չկան` բոլորի մայրաքաղաքը,

Որտեղ մենք կանք, բայց վաղուց տանը չենք: 

Հարություն ՀԱՐՈՒԹՅՈՒՆՅԱՆ