Ադրբեջանի բանակը կյանքում հաղթանակ չի տարել

Ադրբեջանական բանակի օրը տեղի ունեցած ռազմական զորահանդեսի ժամանակ Ադրբեջանի նախագահ Իլհամ Ալիեւը հայտարարել էր, թե պատերազմի առաջին փուլն է ավարտված, պատերազմն ավարտված չէ: Արդյոք սա պատերազմի սպառնալի՞ք է, թե՞ հերթական շանտաժը: Հարցի մասին այսօր լրագրողների հետ խոսեցին քաղաքագետ Լեւոն Մելիք-Շահնազարյանն ու ռազմական փորձագետ Դավիթ Ջամալյանը:

Ըստ ռազմական փորձագետի` եթե երկիրը պատրաստվում է պատերազմի, նա պետք է ունենա այդ պատերազմի պատկերացումը` պլանը, թե ինչպես է վարելու այն:

«Ենթադրելով Ադրբեջանի` սպառազինությունների ձեռքբերման տրամաբանությունից, մենք խնդիրը ձեւակերպում ենք, որ Ադրբեջանի բանակի առջեւ խնդիր է դրված մի քանի տեղերից կայծակնային հարվածներով գրավել ինչ-որ տարածքներ: Այդ նպատակը իրականացնելու համար Ադրբեջանը պատրաստ չէ, փաստը մնում է փաստ, քանի որ եթե պատրաստ լիներ, կսկսեր այդ գործողությունները»,- ասաց Դավիթ Ջամալյանը:

Ինչ վերաբերում է ալիեւյան հայտարարությանը, ապա ռազմական փորձագետը դրանք ստանդարտ եւ սպասելի հայտարարություններ որակեց, միաժամանակ նշեց` գիտենք, որ պատրաստվում են պատերազմի, պետք է քայլեր ձեռնարկենք, որ դրանք մնան լոկ հայտարարություններ:

Անդրադառնալով հայտարարությանը` Լեւոն Մելիք-Շահնազարյանն ասաց, որ Ալիեւն այդ հայտարարությունն անում է տարին առնվազն 10 անգամ եւ տարիներ շարունակ: Քաղաքագետը հիշեցրեց 7 տարի առաջ Ադրբեջանի պաշտպանության նախարարի այն հայտարարությունը, թե պատերազմի վերսկսման հավանականությունը հասել է 100 տոկոսի:

«Ինչ վերաբերում է Ալիեւի հայտարարությանը, նախ` իրենց բանակի օրն էր: Ճիշտ է` խայտառակ օր է. այդ բանակը կյանքում` իր պատմության մեջ, երբեք հաղթանակ չի տեսել` ո'չ 1918-20 թվականներին ու ո'չ էլ 1991 թվականից մինչ օրս: Ավելին` բանակի օրը համընկել է Բաքվի անկման հետ` 1721 թվականի հունիսի 26-ին Բաքուն հանձնվել է ռուսական զորքին: Ինչու են այդ օրն ընտրել` երեւի դա ճակատագիր է, որը նաեւ խորհրդանշական է: Ալիեւն այսօր փորձում է լուծել նախընտրական խնդիրներ»,- ասաց քաղաքագետը ու հիշատակեց նման հայտարարության այլ նպատակակետեր եւս` բանակին հատկացված փողերի լվացման փորձ, իր ներսի բնիկ` ոչ թյուրքական ազգերի խնդիրը, որը գնալով ուժգնանում է, ինչպես նաեւ իսլամական շարժման հարուցած խնդիրները, որոնք ուժեղանում են կայծակնային արագությամբ: