Ֆրանսիացիներն այլեւս չեն հավատում ԵՄ-ին

Ֆրանսիացիների մեծ մասն արդեն չի հավատում ԵՄ-ի հաջող գործունեության հնարավորությանը: Դրա վկայությունն են ամերիկյան Pew Research Center-ի անցկացրած հարցումները. տեղեկացնում է Интерфакс-ը:

Այսպես`հենց Ֆրանսիայում է նկատվում եվրոպական նախագծի նկատմամբ վստահության զգալի անկում. եթե 2012-ին հօգուտ ԵՄ-ի հանդես էր գալիս ֆրանսիացիների մոտ 60 տոկոսը, այս տարի` ընդամենը 41 տոկոսը: Բացի դրանից` Ֆրանսիայի քաղաքացիների 91 տոկոսը համարում է, որ ԵՄ-ում ստեղծված տնտեսական իրավիճակն անբարենպաստ է, ինչը 10 տոկոսով բարձր է անցած տարվա ցուցանիշից:

Ամենալավատեսները Եվրոպայում Գերմանիայի քաղաքացիներն են: Նրանց 60 տոկոսը շարունակում է հավատալ ԵՄ-ի զարգացմանը (2012-ին` 68 տոկոս):

Միաժամանակ, եվրոն շարունակում է ընդունելի լինել հարցվածների համար. 60 տոկոսը ցանկանում է պահպանել միասնական արժույթը:

Pew Research Center-ն իր հարցումն անցկացրել է մարտի 2-27-ը Գերմանիայի, Ֆրանսիայի, Իսպանիայի, Իտալիայի, Հունաստանի, Լեհաստանի, Չեխիայի եւ Մեծ Բրիտանիայի 7,6 հազար բնակչի շրջանում: