Ֆրանսիացիներն Արցախում

Ապրիլի 22-ին ԼՂՀ արտաքին գործերի նախարար Գեորգի Պետրոսյանն ընդունել է Ֆրանսիայից ժամանած պատվիրակությանը, որը գլխավորում է ֆրանսիական խորհրդարանի պատգամավոր, Ալֆորվիլ քաղաքի քաղաքապետ Ռենե  Ռուկեն, այս մասին հայտնում են ԼՂՀ ԱԳՆ մամուլի ծառայությունից:

Հյուրերը նշել են, որ այցի գլխավոր նպատակն է` Արցախը ցույց տալ ֆրանսիական «Դպրոցասեր» գիմնազիայի մի խումբ սաների, որոնց այցը կազմակերպել է բարերար Սարգիս Բեդոյանը:

ԼՂՀ արտաքին քաղաքական գերատեսչության ղեկավարը հյուրերին ներկայացրել է ղարաբաղյան ազգային-ազատագրական շարժման եւ պետականաշինության հիմնական փուլերը, նշելով, որ համապատասխան ռազմավարական ծրագրի իրականացման շնորհիվ հանրապետությունը վերականգնողական փուլից անցում է կատարել դեպի զարգացման փուլ: Նա ընդգծել է, որ 2006 թվականին հանրապետության սահմանադրության ընդունումը դարձավ բեկումնային պահ եւ ընդհանրացրեց անկախ պետականության կառուցման տարիներին ձեռք բերված բոլոր նվաճումները: