Վարդան Ղուկասյանի եղբորորդուն բերման են ենթարկել Բագրատաշենի անցակետից

Ոստիկանության Շիրակի մարզային վարչության ծառայողների ձեռնարկած միջոցառումների արդյունքում՝ այսօր կեսօրին Գյումրիում հանցագործություն կատարելու կասկածանքով, Բագրատաշենի սահմանային անցակետից ոստիկանության Գյումրիի բաժին բերման է ենթարկվել Գյումրու նախկին քաղաքապետ Վարդան Ղուկասյանի եղբորորդին` Կոլյա Ղուկասյանը: Այս մասին yerkir.am-ին հայտնեց ոստիկանության լրատվության բաժնի աշխատակից Արմեն Մալխասյանը:

Ավելի վաղ հայտնել էինք, որ այսօր` Ժամը 13.00-ի սահմաններում, Գյումրիի բժշկական կենտրոնից ոստիկանության Գյումրիի բաժնում ահազանգ է ստացվել, որ Գյումրի քաղաքի Շիրակացի 54բ շենքի մոտից հրազենային վնասվածքներով իրենց մոտ են տեղափոխվել Հարություն Խաչատրյանը և Արտյոմ Կարապետյանը: Վերջինս հիվանդանոցում մահացել է: Փաստի առթիվ ոստիկանության Շիրակի մարզի քննչական բաժնում հարուցվել է քրեական գործ ՀՀ քրեական օրենսգրքի 104 հոդվածի հատկանիշներով: