Լուիս Սուարեսը տուգանվել է

Անգլիական «Լիվերպուլ»-ը տուգանել է Լուիս Սուարեսին Բրանոսլավ Իվանովիչի ձեռքը կծելու համար:

 Դեպքը տեղի է ունեցել  անգլիական Պրեմիեր լիգայի 34-րդ տուրի` «Չելսիի» հետ  հանդիպման ժամանակ (2:2): «Լիվերպուլ»-ի  ուրուգվայցի հարձակվող Լուիս Սուարեսը կծել է լոնդոնցիների պաշտպան Բրանիսլավ Իվանովիչի ձեռքը:

Ուրուգվայցին հրապարակավ  ներողություն է խնդրել  Իվանովիչից: Ինչ վերաբերում է տուգանքին, Սուարեսն իր Twitter-ում գրել է. «Իմ անընդունելի պահվածքի համար ակումբը ինձ տուգանել է: Ես խնդրել եմ այդ գումարը փոխանցել «Հիլլսբորո»-ում տուժածների ընտանիքին»:

(1989թ-ին Անգլիայի գավաթի կիսաեզրափակիչ հանդիպման ժամանակ («Լիվերպուլ»- «Նոթինհեմ Ֆորեսթ») մարզադաշտում տեղի ունեցած հրմշտոցներից զոհվել է 96 երկրպագու):

Բացի այդ` Լուիս Սուարեսը դարձել է այդ օրվա հանդիպման հերոսը. հավասարեցնելով խաղի  հաշիվը` կարողացել  է օգնել իր թիմին խուսափել պարտությունից: