Ոստիկանությունն ու ԱԱԾ-ն կմիավորվե՞ն

«Ժամանակի» տեղեկություններով՝ Սերժ Սարգսյանի երդմնակալությունից հետո մինչեւ նոր կառավարության կազմի հրապարակումը չեն բացառվում կառավարության կառուցվածքային վերափոխումներ:

Ոստիկանապետ Վլադիմիր Գասպարյանի գլխավորությամբ կարող են միավորվել Ոստիկանությունն ու Ազգային անվտանգության ծառայությունը, որի կազմից դուրս կմնա միայն արտաքին հետախուզությունը: Երկու գերատեսչությունների միավորումից հետո Ոստիկանությունը կրկին կվերանվանվի Ներքին գործերի նախարարություն:

Հիշեցնենք, որ Հայաստանում Ոստիկանությունը եւ ԱԱԾ-ն համակարգող նախարարության վերջին նախարարը եղել է Սերժ Սարգսյանը: 1999թ. այդ կառույցը տարանջատվեց: Իսկ 2002թ. ՆԳՆ-ն դարձավ Ոստիկանություն, որը նախարարությունից վերածվեց կառավարությանն առընթեր մարմնի: Նույն ժամանակ նախարարությունից կառավարությանն առընթեր մարմնի՝ ծառայության կարգավիճակ ստացավ նաեւ ազգային անվտանգության նախարարությունը:»,- գրում է «Ժամանակը»։