Քոչարյանը պնդեց` ոստիկանությունն ու ԱԱԾ-ն նախարարություն դարձնելու համար սահմանադրական փոփոխություններ են հարկավոր, Մարուքյանը հակադարձեց` այդպես չէ

ԱԺ-ում «Իմ քայլը» խմբակցության պատգամավոր Անդրանիկ Քոչարյանին պաշտպանության և անվտանգության հարցերի մշտական հանձնաժողովի նախագահ ընտրելու հարցի քննարկման ժամանակ ԼՀԿ խմբակցության ղեկավար Էդմոն Մարուքյանը Քոչարյանից հետաքրքրվեց` ի՞նչ կարծիք ունի այն մոտեցման մասին, որ ԱԱԾ-ն և ոստիկանությունը պետք է նախարարությունների կարգավիճակով ներառվեն կառավարության կառուցվածքի մեջ և վերադառնան խորհրդարանական վերահսկողության տակ:

Մարուքյանը հիշեցրեց, որ 2006 թվականին ՀՀ երկրորդ նախագահ Ռոբերտ Քոչարյանն էր կառավարության կառուցվածքից հանել այս կառույցները, որ խորհրդարանական վերահսկողությունից դուրս լինեն և անմիջապես ենթարկվեն մեկ մարդու:

Անդրանիկ Քոչարյանը պատասխանեց, որ Ռոբերտ Քոչարյանը դա արել էր կոնկրետ նպատակի համար` հոկտեմբերի 27-ից հետո: «Ռոբերտ Քոչարյանն այդ ժամանակ, խախտելով Սահմանադրությունը, հեռացրեց նաև Վաղարշակ Հարությունյանին: Այնպես որ` Ռոբերտ Քոչարյանի` որպես Սահմանադրության խախտման մասնագետի քննարկման խնդիր չկա: Բայց Դուք հիմա առաջարկում եք Սահմանադրության փոփոխություններ, որպեսզի Ձեր ասած կառույցները դառնան նախարարություն: Կարծում եմ` գուցե կա այդ անհրաժեշտությունը, որ ոստիկանության և ԱԱԾ կարգավիճակը բարձրացվի, որ լինեն նախարարությունների կարգավիճակով և լինել ավելի վերահսկելի»,- ասաց նա:  

Մարուքյանն էլ հակադարձեց, որ սուպերվարչապետական համակարգը մեծ հաշվով ստեղծվել է  այլ օրենքներով, ոչ թե Սահմանադրությամբ: «Հետևաբար` այսօրվա Սահմանադրությունը թույլ է  տալիս այս մարմիններին` վերադարձնել կառավարության կառուցվածք «Կառավարության կառուցվածքի մասին» օրենքով: Դա կառավարության մենաշնորհն է, և կառավարությունը միայն այն կարող է նախաձեռնել և բերել խորհրդարան, բայց մենք կարող ենք առաջարկներ ներկայացնել: Այսինքն` այս օրենքի փոփոխությամբ կարող է վերադարձվել այն տեսքին, որը եղել է մինչև Ռոբերտ Քոչարյանի փոփոխելը»,- նշեց նա:

Անդրանիկ Քոչարյանն էլ ասաց, որ դա  ժամանակ է պահանջում և ճիշտ հաշվարկված քայլեր: