Լիտվայի Սեյմի հռչակագրի ընդունումը նախադեպ է. Լիտվայում ՀՀ դեսպան

Լիտվայի Հանրապետության Սեյմի 6 պատգամավորների՝ Սեյմում Արցախի Հանրապետության հետ Բարեկամության խումբ ստեղծելու մասին հռչակագրի ուրախալի նախադեպի մասին yerkir.am-ը զրուցեց Լիտվայում ՀՀ արտակարգ եւ լիազոր դեսպան Արա Այվազյանի հետ: Ներկայացնում ենք այդ զրույցը:

-Պարո’ն Այվազյան, նախ` շնորհավորում ենք Ձեզ ու բոլորիս այս նշանակալի հաջողության համար, եւ կխնդրեինք ասել, թե ինչպիսի տրամադրության մեջ եք այս իրադարձության առթիվ, այժմ ինչպիսի՞ վիճակ է ստեղծված Ձեզ մոտ:

-Սա, կարծում եմ, նոր նախադեպ է ստեղծում Լեռնային Ղարաբաղի Հանրապետության միջազգային ճանաչման գործընթացում մեր տարվող աշխատանքների եւ ընդհանուր` բոլորի կողմից տարվող աշխատանքների հարցում: Եվ կարծում եմ, որ Լիտվայի Սեյմում այսօրվա տեղի ունեցած իրադարձությունը կարելի  է համարել պատմական իրադարձություն: Առաջին անգամ արտասահմանյան որեւէ խորհրդարանում ստեղծվում է, մեջբերում եմ հռչակագրից, Լեռնային Ղարաբաղի Հանրապետության հետ բարեկամության խումբ: Պետք է ասեմ, որ սա կտրուկ փոփոխություն է, որը համատեղ, համակարգված եւ համադրված աշխատանքների արդյունք է: Որովհետեւ ընդամենը մեկ տարի առաջ Լիտվայի Սեյմում շատ վտանգավոր տենդենցներ, զարգացումներ էին տեղի ունենում, երբ ադրբեջանամետ պատգամավորները փորձում էին ընդունել տալ ծայրաստիճան անհավասարակշիռ մի փաթեթ ԼՂՀ-ի կարգավորման վերաբերյալ:

-Ինչպե՞ս հաջողվեց հասնել այս արդյունքին, ի՞նչ ջանքերի, եռանդի շնորհիվ, ի՞նչ գործողությունների ու քայլերի արդյունքում:

-Ջանք ու եռանդ շատ է գործադրվել, եւ, ինչպես արդեն նշեցի, սա համադրված ու քրտնաջան աշխատանքի արդյունք է: Ուզում եմ նաեւ հատուկ ընդգծել, որ Լիտվան աշխարհում առաջին երկիրն էր, որ ճանաչել է ՀՀ անկախությունը, եւ դա պատահական փաստ չէր: Ու այսօր էլ Լիտվայի խորհրդարանի պատգամավորները, որոնք, իսկապես կարելի է ասել, բարոյականության ու վեհ գաղափարների կրող են, առաջինը եղան, որ այս շատ կարեւոր քայլը կատարեցին:

-Դիվանագիտական տեսանկյունից ելնելով` ինչպիսի՞ գնահատական կտաք այս արդյունքին, ինչպիսի՞ հետագա զարգացումներ ու հետեւանքներ կարող է ունենալ հռչակագրի ընդունումը:

-Դիվանագիտական առումով, իմ կարծիքով, սա ընդհանուր աշխատանքների մի շատ կարեւոր հանգրվան է, սա վերջնական հաղթանակ չէ, եւ բնականաբար, մեր հակառակորդ կողմը այս քայլի արդունքում կկրկնապատկի ու կբազմապատկի իր ջանքերը, բայց մենք այդ ամենը պատկերացնում ենք, եւ ես տեղեկացնեմ, որ մեկ տարի առաջ շատ վատ տենդենցներ էին այստեղ` Լիտվայի խորհրդարանում, երբ Հայաստանն այստեղ դեռեւս դեսպանություն չուներ, եւ Հայաստանի ձայնն այստեղ այնքան էլ լսելի չէր` բավականին երկար ժամանակ: Կարծում եմ` մեր հակառակորդները ամեն ինչ կանեն` կոմպենսացնելու իրենց համար ոչ այնքան հաճելի զարգացումները, բայց պետք է նաեւ հաշվի առնեն, որ իրականությունը միշտ չէ, որ կարելի է գնել նավթի պատրանքներով, կամ մարդկանց գաղափարախոսությունը, արժանապատվությունը փոխել: Այժմ ընթանում է շատ լարված դիվանագիտական պայքար մեր ամբողջ դիվանագիտական կորպուսի համար, եւ ես կարծում եմ, որ մենք պետք է չսպասենք նրանց պատասխան քայլին` նրանք միշտ փորձում են պատասխան տալ եւ բավականին ագրեսիվ, նախաձեռնողական քաղաքականություն են վարում: Այս անգամ մենք կարողացանք լավ արդյունքի հասնել:

-Պարո’ն Այվազյան, եթե այս հռչակագրի ընդունումը դիտարկենք ԼՂՀ միջազգային ճանաչման գործընթացի համատեքստում, ինչպիսի՞ գնահատական կարելի է տալ, այդ ուղղությամբ այս հռչակագիրն ի՞նչ ազդեցություն կունենա:

-Ոււզում եմ տեղեկացնել, որ կոնֆերանսից հետո, որը տեւեց մոտ 4 ժամ եւ շատ բովանդակալից էր, մասնակից լիտվացիները նշում էին, որ իրենց համար շատ հետաքրքիր կոնֆերանս ու ելույթներ էին: Այդ կոնֆերանսից հետո մենք ունեցանք առանձին հանդիպումներ Սեյմի մի շարք` ե’ւ այդ հռչակագիրը ստորագրած, ե’ւ չստորագրած պատգամավորների հետ, եւ ես վստահ եմ, որ առաջիկա աշխատանքների արդյունքում այդ խումբն ավելի կընդլայնվի: Մենք ուղղակի խոսել ենք կոնկրետ քայլեր անելու ուղղությամբ, որպեսզի այս հռչակագիրը չմնա որպես զուտ փաստաթուղթ: Ամենակարեւորը` որ փաստաթուղթը կյանք ունենա եւ սկսի աշխատել: Ես կարծում եմ, որ միջազգային ճանաչման առումով սա նախադեպ է, եւ ես վստահ եմ, որ այն կունենա իր շարունակությունը շատ երկրներում: Դրա համար, կարծում եմ, բոլոր հիմքերը կան:

-Այս քայլով, կարելի է ասել, Լիտվայում հայկական դիվանագիտական կորպուսը որոշակի առումով առաջ անցավ հակառակորդ կողմից, հետագայում դա կարո՞ղ է հենահարթակ հանդիսանալ, որ հայկական կողմն ավելի նախաձեռնողական քաղաքականություն վարի եւ առաջատարի դիրքերից հանդես գա ու ավելի խորացնի ձեռք բերված հաջողությունը:

-Ես կարող եմ ասել, որ մեր դիվանագիտական ներկայացուցչությունը, առանց այդ էլ, չափից ավելի ակտիվ է, եւ կարծում եմ` մեր բոլոր գործընկերներն էլ բավականին ակտիվ աշխատանք են տանում, ուղղակի պետք է հաշվի առնել, որ դիվանագիտությունն այնպիսի մասնագիտություն է, որ նախաձեռնությունները միշտ չէ, որ անմիջական արդյունք են տալիս. այդ արդյունքները հաճախ ավելի ուշ են լինում: Բնականաբար, մենք այս արդյունքով չենք հանգստանալու եւ փորձելու ենք ավելի հետաքրքիր միջադեպեր ստեղծել:

Զրույցը վարեց Գեւորգ ԱՎՉՅԱՆԸ