ՀԱՍԿ-ը կսատարի Րաֆֆի Հովհաննիսյանին

Հայաստանի աշխատավորական սոցիալիստական կուսակցությունը սատարում է Րաֆֆի Հովհաննիսյանի թեկնածությանը:

ՀԱՍԿ Կենտրոնական կոմիտեի տարածած հաղորդագրության մեջ ասվում է. «Հայաստանի Հանրապետությունը հայտնվել է ճակատագրական ճամփաբաժնի առջեւ: Շարունակել վերջին տարիներին վարվող քաղաքականությունը` նշանակում է երկիրը հասցնել վերջնական կործանման: Ուստի նոր ճանապարհի ընտրությունը հայրենիքի փրկության միակ հնարավորությունն է: Իսկ նոր ճանապարհով կարող են առաջնորդել միայն նոր մտածողությամբ նոր իշխանությունները:

Այս պահին ստեղծված իրավիճակի եւ առկա իրողությունների պայմաններում մեր համոզմամբ նորի` մեզ բոլորիս անչափ անհրաժեշտ ապահով եւ անվտանգ հայրենիքի,ազատ եւ բարեկեցիկ կյանքի,հիրավի նոր եւ արդար Հայաստանի, որակյալ եւ կենսունակ պետության երաշխավոր կարող է լինել միայն ՀՀ նախագահի թեկնածու, «Ժառանգություն» կուսակցության առաջնորդ Րաֆֆի Հովհաննիսյանը, բնականաբար`որոշակի ծրագրերի եւ որոշակի թիմի առկայության պայմաններում:

Ուստի, Հայաստանի աշխատավորական սոցիալիստական կուսակցությունն իր պատրաստակամությունն է հայտնում առաջիկա նախագահական ընտրություններում պաշտպանելու Րաֆֆի Հովհաննիսյանի թեկնածությունը եւ իր ունեցած հնարավոր բոլոր միջոցներով աջակցելու նրա հաղթանակին»: