Ինչո՞ւ Տեր-Պետրոսյանը չէր մոտեցել Րաֆֆի Հովհաննիսյանին

Հայաստանի Քրիստոնեա-դեմոկրատական կուսակցությունն ընտրություններին միայնակ չի գնա, քանի որ կուսակցությունը մեծ չէ, բավականաչափ գումար էլ չկա: Այս մասին լրագրողների հետ հանդիպման ժամանակ հայտնեց կուսակցության նախագահ Խոսրով Հարությունյանը` նշելով, որ ընտրությունները բավականին ծախսատար են:

Ընտրություններից առաջ ուժերի մեծ կամ փոքր վերադասավորումները Հարությունյանը չի բացառում, իսկ նոր խորհրդարան անցնելու շանսեր ունեն ինչպես կոալիցիոն ուժերը, այնպես էլ ներկայիս խորհրդարանական ընդդիմությունը: Նա չբացառեց նաեւ ՀԱԿ-ի եւ «Ազատ դեմոկրատների» մուտքը խորհրդարան:

ՀԱԿ-ի վերջին գործողությունները, ըստ Խ. Հարությունյանի, ոչ այնքան իշխանության դեմ են, որքան խորհրդարանական ընդդիմության: Իր հերթին, խորհրդարանական ընդդիմությունը փորձում է «իր ասելիքն ու քայլերն ավելի խնամքով օգտագործել»:

Այն, որ երեկ Րաֆֆի Հովհաննիսյանը մոտեցավ Տեր-Պետրոսյանին, Հարությունյանի համոզմամբ, խոսում է Հովհաննիսյանի քաղաքակիրթ մարդ լինելու մասին: Դա Հայաստանի Քրիստոնեա-դեմոկրատական կուսակցության նախագահը քաղաքական լուրջ քայլ չի որակում:

Yerkir.am-ի այն հարցին, թե այդ դեպքում ինչի՞ մասին է խոսում այն, որ ժամանակին, երբ Րաֆֆի Հովհաննիսյանն էր նստած հացադուլի, Տեր-Պետրոսյանը նրան չմոտեցավ, Հարությունյանն ընդամենը պատասխանեց. «Որ չմոտեցավ, խոսում է նրա մասին, որ չմոտեցավ»: