ԱԱԾ-ի ձկնիկն ու գառնեցի կնոջ առաքելությունը

Ամիսներ առաջ նախագահ Սերժ Սարգսյանը, խոսելով Հայաստանում կոռուպցիայի դեմ պայքարի մասին, նշեց, որ պետք է սկսել՝ բռնելով կոռուպցիայի գլխից: Սակայն Ազգային անվտանգության ծառայությունը  «կոռուպցիոն  որսը»  սկսել էր դեռևս նախագահի հրամանից առաջ:

ԱԱԾ աշխատակիցները «կարթը» նետել էին կաշառակերների անսահմանափակ օվկիանոսն ու մի փոքրիկ «ձկնիկ» բռնել: Խեղճ «ձկնիկը»  չէր հասցրել «խայծը» կուլ տալ, երբ «կարթը» հայտնվեց կոկորդում: Կուլ տվածն էլ ի՞նչ էր'  աննկատ ճիճու' օվկիանոսի մյուս մեծ ձկների կերած որդերի համեմատ:

Աննկատ էր օվկիանոսում, սակայն ցամաքում «ձկնիկի» կերածի մասին բոլորն իմացան: 40 հազար դրամ կաշառք վերցնելու պահին Կոտայքի նախկին փոխմարզպետ Լևոն Միքայելյանի ձերբակալությունը  դարձավ իշխանամերձ լրատվամիջոցների գլխավոր լուրը: Իսկ թե ով էր ԱԱԾ-ից առաջ լրատվամիջոցներին օպերատիվորեն հրամցրել «հյութեղ» ինֆորմացիան, այլ պատմություն ունի:

Ինչևէ: Շատերն ուրախացան՝ չէ՞ որ ՀՀԿ-ական էր ձերբակալվել, նշանակում է' արդարություն կա: Իսկ թե ինչո՞ւ էր  Գառնիի դպրոցներից մեկի տնօրենը որոշել իր ստացած 150 հազար դրամ աշխատավարձից 40-հազարը հատկացնել Կոտայքի արդեն նախկին փոխմարզպետ Լևոն Միքայելյանին, բնավ զարմանալի չէր: Տնօրենի խոսքով' դպրոցում պարբերաբար ստուգումներ չանցկացնելու համար փոխմարզպետն իրենից պահանջել է նախանշված գումարը:  Ինչի՞ց է վախեցել տիկին տնօրենը' ստուգումների՞ց: Բնականաբար, ցանկացած կրթօջախում ամեն ինչ անթերի չի կարող լինել, սակայն լուրջ խախտումները թերևս անթույլատրելի են, իսկ տվյալ դպրոցի տնօրենի համար «վատ կլիներ», եթե դպրոցում լուրջ խախտումներ լինեին:

Եվ որպեսզի կաշառքի չափը շատերի համար ծիծաղի առիթ  չհանդիսանա, ԱԱԾ-ում  փորփրել են փոխմարզպետի անցյալն ու մի քանի «կեղտեր» ևս հայտնաբերել: Տղաները պարզել են, որ 7 տարի առաջ Միքայելյանը, չարաշահելով իր պաշտոնեական դիրքը, «Գառնիի առողջության կենտրոն» ՊՓԲԸ-ի տնօրեն Գրիգոր Գրիգորյանին վճարել է տվել իր մեքենայի անվադողերի համար (մեր տեղեկություններով' դա արվել է փոխմարզպետի լավության դիմաց): Չգիտես ինչու' 7 տարի լռած «տուժողը» հանկարծ որոշեց բողոքել:

ԱԱԾ-ի տղաները, եթե ջանք ու եռանդ չխնայեին, գուցե փոխմարզպետի մանկության տարիների խուլիգանություններն էլ գտնեին ու տեղը տեղին գործ սարքեին, թե չէ ամոթ չէ՞ր' ասեին 40 հազար դրամի համար մարդուն բռնել տվեցին: Ինչպես ասում են' կաշառքը մնում է կաշառք'  լինի  40 հազար դրամ, թե դոլար, միևնույն է, փոխմարզպետի մեղքն ապացուցվել է:

Հատկանշական է, որ փոխմարզպետի դեմ ցուցմունք են տվել Կոտայքի մարզի Գառնիի 2 դպրոցների կին տնօրենները: Այն, որ նրանք իրենց կամոք չեն բողոքել, հաստատ է, իսկ թե ով է փսփսացել նրանց ականջին, «անհայտ» է: 
Միքայելյանի դեմ մարզի մյուս տնօրեններից էլ  ցուցմունք վերցնելու ջանքերն ապարդյուն էին անցել. ոմանց մի քանի անգամ էին հրավիրել զրույց-հարցաքննության, սակայն ոչինչ չէր ապացուցվել:

Այսքանով գառնեցի տնօրինուհու և նրա կոլեգաների առաքելությունը համարվեց ավարտված: Իսկ թե որքան ժամանակ նրանք կմնան իրենց  պաշտոնին, գիտի միայն մեկը' Կոտայքի մարզպետ Կովոլոնկո Շահգալդյանը:

Լիանա Սեդրակյան