Սելիմի լեռնանցքում տեղում է առատ ձյուն

ԱԻ նախարարության լրատվական ծառայությունը տեղեկացնում է, որ  նոյեմբերի 6-ին Սելիմի լեռնանցքում առատ ձյան հետեւանքով արգելափակվել են տրանսպորտային միջոցներ եւ տեղում առաջացել է խցանում:

Դեպքի վայր մեկնած` Վայոց ձորի մարզային փրկարարական վարչության ջոկատի փրկարարների ուժերով ավտոճանապարհի 30-րդ կմ-ից երթեւեկության անվտանգ հատված են դուրս բերվել «Ֆորդ Տրանզիտ» մակնիշի 27 ՕԼ 618 պետհամարանիշի (վարորդ՝ Հ. Բաղդասարյան), իսկ ավտոճանապարհի 35-րդ կմ-ից` «ՎԱԶ-21010» մակնիշի ՏՏ 0344 պետհամարանիշի (վարորդ` Վ. Բադեյան, ուղեւոր` Վ. Համբարձումյան) ավտոմեքենաները:

Հետագա խցանումները բացառելու նպատակով` Գեղարքունիքի եւ Վայոց ձորի ճանապարհային ոստիկանության մարզային ստորաբաժանումների կողմից Եղեգնաձոր–Մարտունի ավտոճանապարհին իրականացվում է հերթապահություն:

Տեղեկատվության համաձայն` դեպքի վայրում կատարվում են մաքրման աշխատանքներ: