Ճգնաժամը Հայաստան էլ կհասնի

Համաշխարհային տնտեսական ճգնաժամի երկրորդ ալիք կլինի եւ մեծ ազդեցություն կունենա Հայաստանի տնտեսության վրա:

«Ես այն մարդկանցից եմ, ովքեր, հետեւելով համաշխարհային շուկայում տեղի ունեցող գործընթացներին, դրանց վերլուծություններին, հակված են կարծելու, որ բոլոր դեպքերում լինելու է դա»,- այսօր լրագրողների հետ հանդիպման ժամանակ ասաց  Հայ ազգային կոնգրեսի ներկայացուցիչ, տնտեսագետ Վահագն Խաչատրյանը:

Նրա խոսքերով` ճգնաժամի նոր ալիքը շարունակելու է կաթվածահար անել ֆինանսական շուկան եւ ներառելու է նաեւ եվրագոտին. «Եվ քանի որ դա ազդելու է եվրագոտու վրա, ազդելու է նաեւ Հայաստանի վրա, քանի որ Եվրոպայի հետ Հայաստանի առեւտրաշրջանառությունը բավական զգալի է»:

Ճգնաժամը կազդի Հայաստանի վրա նաեւ, քանի որ այն կախված է Ռուսաստանի տնտեսությունից: Իսկ ճգնաժամը չի շրջանցի աշխարհի այնպիսի խոշոր տնտեսություն ունեցող երկրներից մեկին, ինչպիսին Ռուսաստանն է:

Վահագն Խաչատրյանի խոսքերով` դրան պետք է պատրաստվել,  դրա մասին միայն խոսելն անօգուտ է: