Ժամանակը կգա, կխոստովանեն

«Երկիր»-ի հարցերին պատասխանել է Հայաստանի ժողովրդական կուսակցության վարչության քարտուղար, ՀԱԿ ներկայացուցիչ Ֆելիքս ԽԱՉԱՏՐՅԱՆԸ:

- Օրերս մեր թղթակցի հետ ունեցած հարցուպատասխանում ՀՀՇ վարչության նախագահ Արամ Մանուկյանը խոստովանեց, որ վերջին շրջանում համախոհների զանգված են կորցրել: Դուք շարունակում եք պնդել, որ ՀԱԿ-ի հանրահավաքներն ու մասնավորապեսՙ վերջին օրերի նստացույցն աննախադեպ էր իր մարդաշատությամբ:

- Որպես սովորական հանրահավաք եւ նստացույց որ վերցնես, գերազանցում էր 2008թ. մարտին, բայց այն մասսան, որ մեզ անհրաժեշտ է մեր նպատակին հասնելու համար, դեռեւս չկա: Այո, այսքան ժողովրդով միտինգ կարելի է անել, փառավոր նստացույց կարելի է անել, բայց մենք գտնում ենք, որ դա բավարար չի մեր գլխավոր նպատակի համար:

- Բայց եթե համեմատենք այս տարվա փետրվար, մարտ ամիսների հետ, տարբերությունն ակնհայտ է:

- Թույլ տվեք այդ հարցին չպատասխանեմ, որովհետեւ ոչ թե վախենում եմ կամ բան, այլ այդպիսի հաշվարկ չեմ արել: Միշտ, որ ամբիոնում եմ եղել, տեսել եմ, որ հրապարակը լիքն է, բայց ավել էր, թե պակաս, չեմ կարող ասել:

- Օրակարգը փոխվել է, եւ հիմա էլ պահանջում եք Սերժ Սարգսյանի հրաժարականը: Դուք ինքներդ հավատո՞ւմ եք, որ նման բան կլինի:

- Եթե չհավատանք, բա ի՞նչ պիտի անենք: Իհա՛րկե հավատում ենք: Այնպիսի ռումբ, որ պայթեցրեց Շառլ Ազնավուրը, եթե մի քիչ նամուսով մարդ լիներ նախագահի տեղը, կասեր` ներողություն, ես էս սիտուացիայում պետք չեմ:

- Իսկ եթե ամեն դեպքում դա չլինի, կշարունակե՞ք պայքարը եւ ինչպե՞ս:

- Շարունակելու ենք այնքան, մինչեւ ժողովուրդը շատանա, շատանա, շատանա, կրիտիկական մասսան հավաքվի, գնա ասի` հարգելիս, չեղավ սենց:

- Եվ այդպես մինչեւ հերթական ընտրություննե՞ր:

- Այո, մենք մեր պայքարը չենք դադարեցնելու:

- Երկխոսության հավանականությունը բացառո՞ւմ եք:

- Հիմա, ոնց որ ասում են, գնդակը իշխանության դաշտում է, իշխանությունը եթե ասի, որ մենք պատրաստ ենք նստելու երկխոսության ձեր առաջարկած հարցի շուրջ, մենք կերկխոսենք: Թե չէ պիտի ասի` պրոբլեմներ կան, արտագաղթ կա, կրպակների հարց կա եւ այլն, էս հարցերով եկեք երկխոսենք: Դրան, իհարկե, չենք համաձայնի:

- Բայց որքանո՞վ եք խելքին մոտ համարում, որ իշխանությունը կերկխոսի ձեզ հետ նախագահի հրաժարականի հարցի շուրջ:

- Բայց իշխանությունը պիտի հասկանա, չէ՞, որ իրա տեղում չի:

- Արտահերթ խորհրդարանական ընտրությունների հարցը օրակարգից հանել եք: Իսկ հերթական խորհրդարանական ընտրություններին մասնակցելո՞ւ եք:

- Այ, հենց որ քննարկենք, առաջինը ձեզ կասենք:

- Բայց չեք բացառում, որ մոտ օրերս կքննարկվի:

- Իհարկե չենք բացառում: Բա ՀԱԿ-ը հզոր ուժ ա, եւ ինչ-որ ձեւով պետք է մասնակցի:

- Այդ հզոր ուժը, ըստ Ձեզ, որքա՞ն ձայն կհավաքի, քանի՞ հոգով կմտնի Ազգային ժողով:

- Այ, երբ որ որոշենք` ի՞նչ ֆորմատով ենք մտնում, ինչպե՞ս կփոխվի քաղաքական իրավիճակը, այն ժամանակ էլ պարզ կդառնա: Բայց ՀԱԿ-ը հզոր ուժ է. իշխանության մեջ եղած մարդկանցից էլ շատ-շատերը ՀԱԿ-ին համակրում են, բայց ճար չունեն:

- Իսկ ի՞նչ ակնկալիքներ ունեք առաջիկա ընտրություններից ՀԱԿ-ի մասով:

- Գիտեք, դա անշնորհակալ գործ է, այդ մասին Ահարոն Ադիբեկյանին հարցրեք: Ես կարծում եմ, որ ՀԱԿ-ը բավականին համակիրներ ունի, եւ եթե ընտրությունները չկեղծվեն, ինչին ես խիստ կասկածում եմ, մենք շատ ձայներ կհավաքենք:

- Իսկ ի՞նչ երաշխիքներ ունեք, որ արտահերթի դեպքում կեղծիքներ չեն լինի:

- Արտահերթն ուրիշ է, արտահերթի ժամանակ ընդհանուր մթնոլորտն է փոխվում երկրում: Ժողովուրդը հասկանում ա, որ էս իշխանությունը սպառվեց:

- Ինչո՞ւ, ի վերջո, օրակարգից հանեցիք արտահերթի հարցը, գուցե հասկացաք, որ բավականաչափ ռեսուրսներ չունե՞ք:

- Այո, ե՛ւ ժամկետային խնդիր կա, ե՛ւ ռեսուրսի, ի՞նչ թաքցնենք: Համարեցինք, որ դեռեւս պատրաստ չենք պնդելու դրա վրա, պնդելն էլ պետք է արդյունք տա: Մենք էլ նայում ենք` եղանակներ կան, ցուրտ կա, մարդկանց բերենք, գիշերները նստացնենք` որ ի՞նչ:

- Կարծիքներ կան, որ այսօր ՀԱԿ-ի ներսում պառակտումն ավելի շատ է, քան իշխանության հետ ունեցած նրա տարաձայնություններն են:

- Մի՛ հավատացեք:

- Չար լեզուներն ասում են նաեւ, որ ՀԱԿ-ում կան մարդիկ, որոնց հայացքները տարօրինակ կերպով համընկնում են իշխանության հայացքների հետ:

- Այդպիսի մարդ ես չեմ տեսել ՀԱԿ-ում: Եթե համընկնում է, ուրեմն կգնա իշխանություն, իշխանությունն էլ հենց դրան է սպասում:

- Բայց չեք բացառում, որ ՀԱԿ-ում հայացքների, կարծիքների տարբերություն կա:

- Տարբերություն միշտ էլ կա: Լճացում կլինի, եթե տարբերություն չլինի:

- Ինչո՞ւ չեք խոստովանում, որ գնում եք հերթական ընտրությունների:

- Կգա ժամանակը, կխոստովանենք: Ո՞վ է ասում` չենք խոստովանի:

Զրուցեց Շուշան ՇԱՀՎԵՐԴՅԱՆԸ